Barca chhuahsan tur Jordi Alba

Jordi Alba chuan tun season tawp rualin Barcelona a chhuahsan tur thu a tichiang. Catalan club tan hian 2024 June thla thleng daih contarct nei mah se, tun hnaiah club nen hian inremsiamna in an inṭhen dawn a ni.

Spanish defender hi kum 34 mi a ni tawh a, a vanglai a pel tawh. Barcelona player awm lai hlawh hnem zinga mi a ni a, tuna a hlawh ang zat hi Barcelona chuan pek reng an harsat - a hlawh tihhniam a nih ngawt loh chuan a tan cham reng a rem tawh lo.

La Masia aṭanga inzir chhuak a ni a, kum naupangte ni chungin Barcelona hi chhuahsanin Cornelia leh Valencia tan a khel, chumi hnuah a club pangngai Barca lamah bawk a kir leh a, season 11 chhung hun a hmang ta a ni.

Sum lamah Barcelona an talbuai a, an insiamṭha chho mek. Nikum November thla mai khan Gerard Pique a chawl a, tun hnaiah Sergio Busquets chuan season tawp ruala Barca a chhuahsan tur thu a tichiang - tunah Alba a chhuak leh dawn.

An player hlawh tam pathum an chhuak a nih chuan Barcelona hian sum tam tak an senna ṭhin chu a tawp rih dawn tihna a ni a, hei hi an tan chuan thawven hawkna tham a ni ang, chutihrualin hlawhtlinna tam tak chanpui tute an chhuak tur hi an hmunruak a zau ve hle ang.

Player hlawh hnem an chhuak dawn tih a chian ruala hming lo lang nghal chu Lionel Messi a ni. Argentina captain hian Paris Saint Germain tan tun season tawp thleng daih bak contract a nei tawh lo - Paris club hi a chhuahsan dawn tih a chiang tawh.

Kum 35 mi Messi hian Saudi Arabia aṭangin sum tam tak hlawh tura sawmna duhawm tak a dawng a, mahse a la pawm rih lo. A chawr chhuahna Barcelona lama kir leh tur angin thawm a ring hle bawk.

Barca thuneitu lam chuan Messi hi laklet an duh a, an theih ang angin kawng an dap dawn tih pawh an sawi tawh. Messi nei let leh tur chuan sum leh pai dinhmun an siamṭhat a ngai a, an duh tak nei let tur chuan insiksawi an hreh lo a nih pawhin a mak hran lo ang.