Ngaihtuah hmasak ngai ka la ngah - James

A vanglai a pel tawh a, basketball khawvelah a hun hnuhnung lam hmang mektu LeBron James chuan a hma hun atan ngaihtuah tur a ngah thu a sawi, infiamna a ngainat leh hmangaih ber hi a mangṭha ve hun a hnai tawh tih a hriat theih.

James khelhna Los Angeles Lakers hian NBA Western Conference Finals-ah Denver Nuggets an ngam lo a, an chak loh hnu hian kum 38 mi Lakers thiampuipa James awmzel dan tur an inrinsiak nasa hle.

Player ropui bik James chuan, "Tun dinhmunah chuan engmah ka la sawi lawk thei bik lo, engtin nge hun ka hman zel dawn tih hi ngaihtuah tur a tam hle," a ti a, chawlh hun tur chu a la sawi thei rih lo.

American center hian tun hmain Miami Heat chu NBA nomawi vawi hnih a chawipui, chumi hnuah Cleveland Cavaliers (2016) chu a vawi khatna turin NBA champion a nihpui - a chawr chhuahna Cleveland tan chuan a hlu hle.

Heat leh Cavs tana a hlawhtlin hnuah Lakers a zawm a, 2020 khan an champion leh bawk. NBA Finals bikah hian ṭum li ngawt chu Finals Most Valuable Player (MVP) atan thlan a ni hial.

An ram United States chu Olympic gold medal pawh vawi hnih a lakpui tawh a, NBA huangah hian point nei hnem ber a ni mek, record hmasa lo chelh tawhtu Kareem Abdul-Jabbar (38,387) chu February thla khan a khum fel tawh a ni.

James chuan, "Season kan hman dan hi duhthusam chu a ni kher lo mai thei, a bik takin regular season kan hmang ṭha tawk lo. Mahse, a pumpui kan thlir a nih erawh chuan kum ṭha tak chu kan hmang niah ka ngai.

"Kan hmaah eng nge lo thleng dawn chu kan la hre lo, basketball kan khel dawn a nih chuan chak duhna thinlung kan nei tur a ni a, champion châkin kan tuihal tur a ni, chumi kan nei a nih chuan inkhel zel tlak kan ni," a ti.

James hian kumin August thla mai khan Lakers tan hian contract a la ziak a, an inremna ang chuan 2024-2025 season thleng a la inkhel zel rih dawn a ni.