Caicedo & Allister ten level sang zawka khelh an phu - Roberto de Zerbi
Brighton & Hove Albion boss Roberto de Zerbi chuan a player chhuak mai thei dinhmuna ding, Moises Caicedo leh Alexis Mac Allister te chuan level sang zawka khelh an phu thu a sawi a, player pahnih duhtu club-te tan chuan hei hi rimawi a tling ang.
Seagulls (Brighton sawina) hian an club chanchina a vawi khat nan season tharah European football an khel dawn a, mahse, an player neih ṭhat Caicedo leh Mac Allister te hi club lian zawkten an rim mek langsar an ni.
De Zerbi chuan, "Hna ka thawh reng rengin keimah leh club ka ngaihtuah ṭhin a, chutihrual chuan ka player-te hma hun tur pawh ka ngaihtuah tel ṭhin - player-te hian career pakhat chiah an nei a, vawi khat chauh nung tur an nih bawk avangin an thutluknaah lo sawi theih kan nei lo," a ti.
January khan Arsenal chuan Ecuador international Caicedo hi pound maktaduai 70-a lei an tum a, mahse, Brighton hian an player hi chhuah phal loin an chelh.
Argentina tana World Cup nomawi chawitu Mac Allister pawh hi Liverpool nen sawizawm a ni a, Reds hian nipui transfer-ah Argentine midfielder lakluh tum hian thapui an thawh dawn, nia sawi a ni.
Mac Allister hi Manchester City nen pawh sawi zawm a ni a, mahse, khawthlang media ṭhenkhatin an tarlan dan chuan Liverpool nen hian mimal thilah an inrem hnai hial tawh.
De Zerbi chuan, "Club thlak turin hun ṭha an nei dawn a, a chhan chu level sang zawk khelh an phu vang a ni. Tony Bloom (Brighton neitu) hian eng angin nge thutlukna a siam dawn, ka hre lo.
"Mahse, tunah chuan European football kan khelh dawn avangin kan level pawh a sang sawt ve tawh tho a ni. A hmaa kan tih theih loh kha kan ti dawn tlat a ni," a ti a, a player-te tan pawh cham chhan ṭha tak a awm thu a sawi.
Brighton hian nizan khan Manchester City nen league match an khel a, an result kan hre hman lo. Europa Conference League chu season tharah an khel dawn chiang a, Europa League khel turin match hnih aṭangin point khat chiah an mamawh tawh.
De Zerbi naute hian point hmuh belh lo pawh ni se an goal difference avangin Europa League hi chu an khelh tho tho a rinawm a, season thara squad an insiamrem dan tur hi hriat a châkawm ta hle.