Everton-ah Doucoure a cham zel dawn

Abdoulaye Doucoure chuan Everton chhuahsan theihna remchang nei mah se, Premier League aṭanga tla thei dinhmuna ding mek club-ah season khat dang a khelh chhunzawm dawn.

Kum 30 mi Doucoure hi tun nipuiah Merseyside club-a a contract a zo dawn a, mahse, kum khat dang pawhsei theihna dan a contract-ah hian ziah tel a ni.

Everton chuan hei hi remchangah lain, kum khat dang atan an midfielder hi an chelh a, season tharah Premier League nge Championship an khelh dawn, tih chu Pathianni zanah a chiang ang.

Premier League table-a 17-na dinhmun luah mektu Everton hian match 37 aṭangin point 33 an nei mek a, 18-na Leeds United leh 19-na Leicester City aiin point hnih chiahin an sang zawk.

Pathianni zan dar 9:00 hian Bournemouth an mikhual dawn a, he inkhelah hian hnehna an chan chuan Premier League khel chhunzawm turin an inhamtang ang.

Frank Lampard enkawlna hnuaiah Doucoure hian hmun chang phak lo mah se Sean Dyche-a hnuaiah hmun pawimawh a chang a, a match hnuhnung pakuaah goal li a khung.

Kum 2020 khan Watford aṭangin Merseyside club hi pound maktaduai 20-in a zawm a, inelna hrang hrangah match 94 khelhsaka goal kua khungin, assist vawi kua a nei bawk.