Lucknow aia tlo zawk Mumbai; Zaninah Gujarat Titans Vs Mumbai Indians

Indian Premier League-ah beisei angin playoff a la nung tawk lo, chutihrualin thih leh dam kara leng an nih tawh avangin inkhel erawh a hmuhnawm hrim hrim.

Qualifier 1-ah Chennai Super Kings-in Gujarat Titans hnehin final an lut a, Titans tan nomawi hum turin zanin dar 7:30 hian qualifier 2-ah Mumbai Indians an hneh a ṭul dawn.

Rohit Sharma captain-na hnuaia khel Mumbai hian May 24, Nilaini zan khan M. A. Chidambaram Stadium, Chennai-ah Lucknow Super Giants chu 81 runs-in an hneh. Final hi May 28, Pathianni zan hian Narendra Modi Stadium, Ahmedabad-a khelh tur a ni.

Mumbai nge nge

Mumbai Indians hi tun season ṭantirh match hmasa pahnih an chak lo a, league round tawp lamah che ṭhain playoff khel turin an tling hram.

Eliminator-ah Mumbai-in vuak hmasak an thlang a, captain Rohit Sharma (11) leh Ishan Kishan (15) ten run tam siam lo mah se Cameron Green (41) leh Suryakumar Yadav (33) te zarah an dinhmun duhawm zawkah an ding.

Tilak Varma (26), Tim David (13) leh Nehal Wadhera (23) ten run tlem a zawng rawn belh ve bawkin over 20-ah 182/8 runs an siam. Target ṭha tak chu ni lo mah se chakpui tham erawh a ni pha tho.

Lucknow captain Krunal Pandya-a'n thutlukna huaisen a siam a, Quinton de Kock aiin Kyle Mayers a thlang. Mayers-a'n 18 runs chauh a siam a, Marcus Stoinis-a'n 40 runs siam ve bawk mah se chakpui tham a ni lo.

Batter dangte an chet ṭhat miau loh avangin Super Giants-in over 16.3-ah 101 runs siamin an thi vek a, man of the match-a thlan Akash Madhwal-a'n run nga lek pein wicket a la! Kum 29 mi Madhwal hi India tan pawha la khel lo a ni a, tun ṭum IPL eliminator-ah erawh a khel ṭha chungchuang hle.

Zaninah Qualifier 2

Mumbai hi nikum season khan an che ṭha lo a, chutihrualin vawi nga champion tawh Mumbai hi stage sangah chuan an tlo leh tlat ṭhin. Rohit Sharma hote hian Lucknow hi vawi khat hnehna a ni a, hun pawimawhah tak an chak.

Zanin hian Qualifier 2 khelh lehnghal tur a ni a, Mumbai hmaah champion lai Gujarat Titans an ding dawn. Rohit Sharma chuan, "Mipuiin tun anga ṭha hian kan bowler-te an chet ṭhat an beisei lo. Jofra Archer inhliam vanga a khel thei dawn lo tih kan hriat khan mawphurhna la ngam an awm a ngai. Player naupang zawkten an hlutna an hriat hi a pawimawh a ni," tiin a sawi.

League round-ah Mumbai bowling a ṭha tawk lo a, eliminator-ah erawh a ṭha viau thung. Qualifier 2-ah a ṭha chhunzawm ang em, tih chu zaninah a hriat dawn a, team ṭha zawk Gujarat Titans hmaah fiahin a awm ang.

Titans tan Wriddhiman Saha leh Shubman Gill ten bul an ṭan ṭhin a, captain Hardik Pandya bakah David Miller, Rashid Khan leh Noor Ahmad te team tan an ṭangkai ṭhin bawk. Pandya hote hi team angin an ṭha a, qualifier 1-ah chesual mah se Mumbai lakah rinkai zawk an ni tho ang.