Mizo naupangten theihna an nei sang - Gopichand

Badminton legend Pullela Gopichand chuan Mizo naupangten badminton-ah theihna sang tak an neih thu a sawi a, Indian badminton national chief coach ni bawk chuan, "A sang ber thleng turin Mizo naupangte hian theihna an nei a, ka ring tawk a ni," tiin Vanglaini a hrilh.

Gopichand hian Gopichand Badminton Academy chu Hyderabad-ah nei mekin, India ram hmun hrang hrangah player ṭha leh beiseiawm zawngin a zin kual ṭhin a, Mizoramah pawh a lo zin fo tawh - May 22 khan ni hnih cham turin Aizawl a lo kal.

Badminton player ṭha Saina Nehwal, P. V. Sindhu leh Srikanth Kidambi te chhertu Gopichand chuan, "Hlawhtling tura a pawimawh ber chu dawhtheih, thawhrim leh tih hram hramna a ni a, miin chu chu a neih chuan a hlawhtlinpui ṭhin," a ti.

Gopichand hian Mizoram a cham chhungin Mizoram chief minister Zoramthanga leh sports minister Robert Romawia Royte a kawm a, "Kan tan Mizoram sorkar a inhawng em em a, kan hmachhawp tam tak pawh a hlawhtlin theih kan beisei," tiin Vanglaini a hrilh.

Kum 2001-A All England Open Badminton Championships-a Indian zinga a pahnihna ni tura champion Gopichand hian Mizoram Badminton Association (MBA) hruaitute nena inkawmna a nei bawk a, Mizo naupangte chuan hlawhtling tura lunglen tawrh an chak a ṭul thu a sawi.

Gopichand chuan, "Academy-a awm an nih chuan in lama haw tlem an zir a ngai a, MBA pawhin naupangte bakah an nu leh pa te pawh fuih thar a ṭul," a ti a, academy-a awm naupangte chu state level inelnaah pawh kum khatah vawi khat bak inlan lo se, tournament tenau dang phei chu khel tawh lo se a duh thu a sawi chhuak.

Mizoramah hian Tata Trusts-in sum leh pai tumin badminton grassroot centre 21 a awm mek a, heta naupang beiseiawm zualte chu Aizawl leh Serchhipa Regional Development Centre-ah an inzir turin dah an ni ṭhin.

Tun dinhmunah Regional Development Centre-ah hian zirlai naupang 30 chuang awm mekin, he centre-a ti ṭha zual player-te chu Pullela Gopichand Badminton Academy (PGBA)-ah inzir tura thlan an ni leh ṭhin a ni.