Vissel Kobe chhuahsan tur Iniesta
Andres Iniesta chuan tun season tawp rualin Vissel Kobe a chhuahsan dawn. Japanese club nen inṭhen mah se football chawlhsan mai erawh a la tum bik lo a, a khelhna tur hmun erawh sawi theih a la ni lo thung.
Spanish midfielder hian 2018 khan Barcelona a chhuahsan a, season 20 chhung a chamchilh tawh Catalan club aṭang hian Vissel Kobe a zawm. J-League-ah hian kum nga chhung chu hun a hmang leh der tawh a ni.
Tunah chuan kum 39 mi a ni tawh a, tun season kal laiah bench aṭanga vawi thum a luh bak chu match a la khel lo. A hun hnuhnung a nih tawh avangin a chet muan bakah hliamin a tlakbuak ve bawk.
Iniesta chuan, "He hmuna ka hun neihte hi pangngai taka hman zawh phawt ka duh. Inkhelh zel ka la duh a, ṭha taka inkhelh ka chawlhsan theihna tur hmuna kal ka duh. Ka tan khawi lam nge pan ila ṭha ang tih chu ka la ngaihtuah leh dawn a ni," a ti.
Kum 2018 khan Iniesta hian Vissel hi a zawm a, match 133 khelhsak tawhin 2019 khan Emperor Cup a lakpui bakah a hnu kumah Japanese Super Cup a lakpui leh bawk.
Iniesta chuan, "He hmunah hian inkhelh ka chawlhsan dawn emawni ka ti hman, mahse thil hi kan duh leh beisei ang vekin a kal thei bik lo. Tun hnaiah training pawh ka nei ṭha viau a, team tana tha thawh pawh ka duh, mahse coach lamin ngaihpawimawh dang a nei," a ti.