Dutch league-a Feyenoord champion puitu Arne Slot chu Tottenham Hotspur nen sawi zawm ni mah se, Dutch coach hian an ram team chhuahsan tumna a nei rih lo a, London club enkawl a tum lo. 
Slot chuan, "Spurs-in min duh thu mi sawi ka hre nasa em em a, ka lawm viau rualin, kei chuan Feyenoord-a cham zel ka duh a, season hmasaa kan hnathawh kha chhunzawm ka duh a ni," a ti. 
Kum 44 mi coach hian July 2021 khan Feyenoord hi a enkawl ṭan a, a season hmasa berah Europa Conference League final thlenpuiin, tun season-ah league nomawi a chawipui. 
Slot chuan, "Nilaini khan Feyenoord thuneitute nen kan indawr a, heta kan sawi ber chu contract pawhsei lam a ni. Club nena kan inbiakna chu he lam hawi hlir hi a la ni rih a, Feyenoord nena season thar hmachhawn ka châk tawh hle," a ti. 
Spurs hian Antonio Conte an ban hnuah coach thar an la nei leh lo. Juventus boss hlui thlak turin assistant coach Cristian Stellini chu manager lailawk turin season tawp thleng atan an ruat a, mahse, match li chauh a enkawl hman tihin an ban!
London club hian 2020-21 season-a coach lailawk atana an lo chhawr tawh Ryan Mason chu coach lailawk atan an ruat leh a, mahse, league match ruk aṭanga point li chiah la hlawh chhuakin, Pathianni zan dar 9:00 hian an league match tawp berah Leeds United an lenchilh dawn. 
Spurs hi Bayern Munich boss hlui Julian Nagelsmann nen pawh sawi zawm ni mah se, German coach nen hian inbiakna an la nei rih lo a, Brighton & Hove Albion manager Roberto de Zerbi erawh an dawr ngei niin Spanish journalist Guillem Balague chuan a sawi. 
Tottenham hi Burnley manager Vincent Kompany nen pawh sawi zawm ni mah se, Kompany hian Championship club-ah hian cham chhunzawm zel turin contract thar a ziak - Spurs coach tur hriat a la harsa zel. 
Leeds United-in coach Jesse Marsch an ban khan Slot hi Leeds nen pawh sawi zawm ni mah se, tun ang tho hian Feyenoord chhuahsan a tum loh thu a sawi a, a chhuak lo. 
Slot hian Dutch club AZ Alkmaar aṭanga a coaching career ṭanin, player a nih laiin FC Zwolle, NAC Breda leh Sparta Rotterdam tana khelin a career zawng zawng Netherlands-ah a hmang zo.
July 2019 khan AZ hi a enkawl ṭan a, December 2020 khan league match khata 2.11 zel point hmu ang ni mah se, Feyenoord nen an indawr avangin club zah loah puh a ni a, ban a ni - July 2021 khan Feyenoord a zawm zui.