MFA Golden Jubilee ropui takin an lawm

Mizoram Football Asso-ciation (MFA) Golden Jubilee lawmna chu May 25, Ningani zan khan Vanapa Hall-ah hman a ni a, MFA hruaitu hlui te bakah MFA hnuaia footballer hlawhtling te leh sawmbik te an kal ṭhahnem hle. Khuallian AIFF secretary general Dr Shaji Prabakaran chuan kum 50 chhunga MFA hlawhtlinna chu ropui a tih thu a sawi.

Zahna chibai

MFA-in kum 50 chhungin hlawhtlinna ṭhahnem tak a chang a, India ram chhunga nomawi chawi theih ang chu an chawi vek a tih theih. Kum 2003 khan National Under 16-ah Mizoram chu a vawi khat nan an champion a, AIFF hnuaia Mizoram champion hmasak ber a ni.

Hemi hnu hian kum bithliah inelnaah MFA tirh Mizoram team-in nomawi ṭhahnem tak an chawi a, chung zingah chuan Santosh Trophy leh National Games te chu a lian zual a ni. A hun laia club inelna sang ber I League-ah MFA hnuaia club Aizawl FC an champion hial bawk.

MFA president Lal Thanzara Sailo chuan, "Hetiang dinhmun ding thei tura sul lo sutute thawhrimna rah kan seng hi a lawmawm. Kum sawmnga chhunga MFA player leh hruaitu boral tate zahna chibai a buk a ni," tiin a sawi.

An chawimawi

MFA chuan President kal chhuak te leh ṭanglai te Lal Thanhawla (founder president), Rosangliana, K. Liantlinga, PC Vanlalhruaia, J. Lalhmingliana leh Lal Thanzara te hnenah chawimawina momemto hlan an ni.

Chawimawina dawngte aiawha thusawitu president hlui J. Lalhmingliana chuan, "President-a kan awm ṭuma kan tih theih ngai loh hlawhtlinna an chang nual a, National Games-ah leh Santosh Trophy-ah Champion nomawi an hawn a, MFA hruaitu te leh player te thawhrimna ka chhuang hle," tiin a sawi.

MFA hian international player lo ni tawhte bakah inelna hrang hranga champion-na hmasa bera player-te leh coaching staff-te hnenah chawimawina thuziak an hlan.

International player chawimawite chu K. Kawla, Zomuanthanga, S. Malsawmtluanga, Jerry Zirsanga, Malsawma, Jeje Lalpekhlua, Robert Lalthlamuana, Lalrindika Ralte, Lalchhuanmawia Fanai, Lalruatthara, Jerry Rinzuala, Laldanmawia Ralte, Daniel Lalhlimpuia, Isaac Vanmalsawma, Lalengmawia Ralte, Lallianzuala Chhangte leh Grace Lalrampari te an ni.

Secy an chawimawi

MFA-in hlawhtlinna an chan theihna tura a sulsutu lian Lalnghinglova Hmar (Tetea Hmar) hnenah chawimawina an hlan. Tetea Hmar hi Asian Football Confederation (AFC) hnuaia Social Responsibility Committee hiala a tel phak avangin MFA chuan an chawimawi.

MFA honorary secretary Lalnghinglova Hmar chuan, "Kum sawmnga chhunga MFA President ten min la dampui vek hi a lawmawm. Footballer tam takin eizawnna an neih theih nan a hruaitu hmasate thawhrimna hi a ropui hle. Tunah chuan AIFF chauh ni loin AFC hnuaia committee member hial kan ni a, kan vai thawhhona rah a ni," tiin a sawi. Tetea Hmar hian Sairang Dinthara, MFA Ground changtlung tak an neih theih nana hma laksaktu Dr Shaji Prabakaran, Secretary General AIFF chungah lawmthu a sawi bawk.

AIFF-in MFA pui dawn

MFA president Lal Thanzara chuan Dr Shaji Prabakaran, Secretary General AIFF chu chawimawina Khumbeu leh Mizo Ipte a hlan. Dr Shaji chuan, "Mizoramah academy ṭha tak a awm theih nan hman kan la dawn a, MFA tan theihtawp ka chhuah ang," tiin a sawi.

Dr Shaji hian Mizoram hi ṭum hnih a tlawhna a ni a, FIFA hnuaia a thawh laiin a rawn kal tawh bawk. AIFF President leh Secretary General ten Mizoram an rawn tlawh a, hei hian Mizoram football hmasawnna a pholang a ni.