Dhoni-a'n CSK a champion pui thei ang em?

Indian Premier League final chu May 28, Pathianni zan dar 7:30 hian Narendra Modi Stadium, Ahmedabad-ah khelh a ni dawn. Chennai Super Kings chuan nizana inkhel Gujarat Titans leh Mumbai Indians chak zawk an hmachhawn ang.

Chennai hi captain Mahendra Singh Dhoni hnuaiah an khel a, kum 41 mi Dhoni hian ram tana inkhelh chawlhsan tawh mah se IPL-ah erawh captain ṭha ber ang hiala chhal theih a la ni.

IPL-ah hian Chennai hi vawi li lai an champion tawh a, final phei chu tun hi ṭum 10 an luhna a ni. Australia opener hlui Matthew Hayden chuan, "MS Dhoni hi chuan thilmak hi a ti thei a ni. Mi duh loh a lak khawmte pawh player ṭha takah a chhuah thei a, captain hma thlir ṭha tak nei a ni," tiin a fak hle.

Tun ṭum inelnaah hian Chennai hian final an lut hmasa ber a, chutihrualin champion tura rinkai an ni tihna erawh a ni lo. Gujarat Titans hian final an lut thei a nih chuan champion lai hi CSK aia buk rit tura ngaih an ni a, Mumbai Indians hi an chak a nih pawhin Dhoni hote rin zawk an la har tho. Mumbai hi batting line up a ṭha a, an captain hi India captain Rohit Sharma a ni.