Manchester United chuan an mikhual Chelsea 4-1 in an sawp a, hnehna an chan avang hian season tharah Champions League an khel dawn tih a chiang nghal bawk. Erik ten Hag-a naute lawmna tizual turin Liverpool chu a sang zual pali zingah an tel phak dawn lo.
Ningani zan Old Trafford-a inkhelah Man United tan Casemiro, Anthony Martial, Bruno Fernandes leh Marcus Rashford ten goal khat ṭheuh an khung a, mikhual team tana Joao Felix goal khungin awmzia a nei phak lo.
Premier League match khelh hmabak pakhat la awm mah se, point 72 neitu Man United hi pangana Liverpool (66 points) tan umphak theih an ni tawh lo. United hian Pathianni zanah season khar nan Fulham an mikhual leh dawn a ni.
Ten Hag chuan, "Premier League hi a hautak a, palina nih phak hi kan thil tum pakhat chu a ni. Manchester United leh Champions League hi chu a inzawm tlat," a ti a, an elpui club dang ten sum an ngah bakah player leh manager ṭha tak tak an nih thu a sawi bawk.
Dutch manager kaihhruaina hnuaiah Man United hian tun season chhungin League Cup an chawi tawh, league-ah palina an ni dawn tih a chian tawh bakah FA Cup final an la khel dawn bawk - Manchester City nen nomawi inchuha an inkhel tur hi a hmuhnawm khawp ang.