Champion tawh team pali inlan dawn

LBS Suzuki 21st Inter Branch YMA Football Tournament-ah vawiin hian match ruk a awm dawn a, CYMA Football-a champion tawh team li ngawt an inlan dawn.

MFA Ground, Sairang Dinthar-ah champion lai Chanmari chuan Zemabawk an hmachhawn dawn. AMC Ward inelnaah Zemabawk hi pahnihna an ni a, tun ṭumah pawh hian team vantlang zinga mi ni mah se Chanmari erawh an khin tawk a la rinawm loh. Chanmari hian ISL player Jerry Mawihmingthanga leh Lalrinliana Hnamte te an kawl bakah MPL hnuhnung ber best player Lalrinchhana Tochawng an kawl.

Kum 2005 champion Republic Vengin kum upa leh naupang an chawhpawlh a, 2008-a final luhpuitu player Lalawmpuia leh Lalchhanchhuaha Jahau ten an la ho a, vawiin hian Darlawn hmaah fiahna a hmachhawn ang.

Vawi hnih champion tawh Ramhlun South-in Thenzawl Jt an hmachhawn dawn a, a awlsam lo ang. Ramhlun South tan Malsawmfela a la ṭangkai reng.

MSSC Ground, Lengpuiah kum 2006 champion Lengpuiin a tawp an khar dawn a, Dawrpui Vengthar nen an inhmachhawn dawn. DPVT-in Sairuatkima te an nei bawk mah se Lengpui hneh tur chuan an vanneih tel a ṭul ang.

Lengpuiah hian team ṭha ITI Veng leh Bethlehem Vengthlang te an inlan bawk dawn. ITI Veng hian Edmund Lalrindika te an kawl avangin Zanlawn lakah harsatna an tawh a rinawm lo a, BVT pawhin player ṭha bakah coach ṭha Lalsangzuala Hmar an neih avangin Republic Vengthlang lakah chak tura rinkai zawk an ni ang.