Premier League aṭangin tu nge tla dawn?

Pathianni zan dar 9:00-ah Premier League club zawng zawng an inlan vek dawn a, football khawvelin a ngaihven chu Championship-ah eng team nge tla ang? tih chu a ni.

Premier League-ah hian Manchester City an champion tawh a, season thara Champions League khel tur a chiang tawh bawk - Manchester City, Arsenal, Manchester United leh Newcastle United te chu top four an ni chiang tawh.

Mahse, chiang lo pakhat a la awm a, chu chu Premier League aṭanga relegate tur a ni. Southampton chu tla chiang tawh an ni a, team dang pahnih an la tla dawn bawk.

Everton, Leicester City leh Leeds United hi fans pawh ngah leh team langsar ni vek an ni a, mahse, an zinga pakhat chiah hian season tharah Premier League an khelh chhunzawm dawn - team dang pahnih an tla dawn a, a lunglenthlak lawk nghal riau asin!

Everton beiseina

British-Iranian sumdawng hausa Farhad Moshiri-a'n Everton a lei laia a suangtuah chu English club ṭha zinga tel a ni a, February 2016-a Everton-a share a neih hnua player lei nan ringawta an senso pawh pound maktaduai 700 a chuang tawh.

Merseyside club hian European club lian tam zawk aiin sum an chelek nasa a, mahse, sumin engkim a lei theih vek bik lo - tunah chuan league table-ah 17-na an ni a, season thara Premier League khel zel turin, Pathianni zan dar 9:00-a Bournemouth hneh a ṭul.

Mahse, Leicester leh Leeds aia Everton vanneihna chu an kuta engkim a la innghat chu a ni - an elpui team pahnih hi chuan hnehna an chan bakah, an elpui team chetsual an chân tel a ṭul dawn.

A tawi zawnga sawi chuan Everton tan him turin vawi khat chak a tawk a, league match 37 khelh tawha vawi sarih chiah chak thei an nih avangin vawi khat chak pawh a harsa viau thei thung.

Mangṭha Foxes?

Kum 2016-a khawvel barakhaiha Premier League champion an nih laite ngaihtuah chuan Championship lama tla mai tura Foxes dah a lunglenthlak a, season hmasa lawka FA Cup an champion takzia te kha - lungtileng thawnthu an chang mai dawn.

Foxes hian April thlatir khan an coach Brendan Rodgers an ban a, FA Cup-a champion puitu coach an ban hnuah Dean Smith an lalut - mahse, an tifuh vak lo. Smith-a hnuaiah league match sarih khel a, vawi khat chiah chakin, Championship an hnaih ta hle.

Leicester hian Pathianni zan dar 9:00-ah vek West Ham an mikhual dawn a, mahse, hnehna an chan bakah Everton an tlawm tel a ṭul a, Leeds United nen point hmuh zat inang mah se Leeds ai hian goal difference-ah an ṭha thung.

A tawi zawnga sawi chuan, hnehna an chân a, Everton an tlawm a, Leeds-in goal an khung tam loh bawk chuan an inhamtang dawn. Smith chuan, "Team pathum hi chuan kan ngaihtuahna kan seng nasa tlang khawp ang," a ti a, chak ngei an tum.

Ngaihlai Leeds

Kum 2020-a Premier League-a Leeds United lo kir zet kha chuan thawm a nei na takzet - Mizoram aṭang ngei pawhin, an vanglai thlirlet a, lungleng tak tak kan awm nual a nih kha. Mahse, ngai chunga zela Leeds hi thlah a ṭul leh mai thei.

Leeds hian Pathianni zan dar 9:00-ah Tottenham Hotspur an mikhual dawn a, hnehna chan bakah Everton leh Leicester chetsual chân tel a ṭul a, midang kutah an hma hun tur a innghat tel tihna a ni.

Premier League table-ah Leeds hi 19-na an ni. League match 37 khelh tawhah vawi sarih chiah an chak a, vawi 20 ngawt an tlawm bawk - goal 47 an khung hi vantlang viau mah se, goal 74 ngawt an chhuah a, tun season Premier League-a goal chhuah hnem ber an ni mek a, an record a ropui lo hle.

Coach Jesse Marsch hoa season bul ṭanin, Michael Skubala (manager lailawk), Javi Gracia leh Sam Allardyce te chu tun season-a coach an neih tawh an ni a, him turin an chak bakah thilmak an mamawh tel.