Tottenham-in Mourinho lung an len lo

AS Roma boss, ṭawngkam bungrua ngah ve tak Jose Mourinho chuan Tottenham Hotspur chu a club enkawl tawh zinga a lunglen lo awmchhun a nih thu a sawi - Spurs fan-te tan chuan thu ngaihthlak nuam tak a ni kher lo ang.

Europa League final-a Roma hruai thlengtu Mourinho hi April 2021 khan Tottenham hian a hna aṭangin an chawlhtir a, London Stadium-ah hian thla 17 bak hun a hmang hman lo.

Mourinho chuan, "Tottenham fan-ten min hriatthiam ka beisei. Mahse, club ka enkawl tawha ka lunglen miah lo awmchhun chu Tottenham hi an ni," a ti a, London lam hawia a lunglen pawhin Stamford Bridge lam chauh a hawi a nih hmel!

Portuguese manager ṭawng duh ve tak chuan, "Spurs ka ngaih lohna chhan pakhat chu ka enkawl lai khan Covid-19 a nih avangin stadium-ah fans an awm ngai lo a, a ruak huau zel. A chhan dang lehah chuan club chairman Daniel Levy-a'n final khel a, nomawi ka chawi theihna remchang min chhuhsak vang a ni," a ti.

Mourinho ban a nih khan League Cup final-ah Spurs a hruai thleng a, Manchester City nen nomawi inchuha an inkhelh nan kar khat pawh a awm tling tawh lo, tihah Spurs hian an ban a ni.

Spurs-in Mourinho an ban hnuah pawh nomawi an la chawi chuang lo a, Portuguese coach erawhin Europa Conference League-ah Spurs chu champion nomawi chawipuiin, tun season-ah Europa League final a hruai thleng bawk - May 31, zan dar 12:30-ah Sevilla nen champion an inchuh ang.

Europa League final an khelh tur thlirlawka media ho nen an inkawmnaah Mourinho hi Roma-a a hma hun chungchang zawh a ni a, Paris Saint-Germain nen pawha sawizawm manager chuan, "Ka club lo enkawl tawh zawng zawng, Pu Levy-a (Spurs Chairman) club tih loh zawng nena inzawmna thuk tak kan nei ang khan, Roma nen pawh hian kan inzawm reng ang.

"FC Porto, Chelsea, Inter Milan, Real Madrid, Manchester United-te nen khan inzawmna thuk tak kan la nei reng a, mahse, Spurs nen chuan a ni ve lo. Club tam tak hmangaih hi a theih lohah mi chuan an ngai mai thei a, mahse, kei chu ka ni ve lo," a ti - Spurs erawhin a lung an dum lo ngang niin a lang!

Roma hian Europa League final hmain league match khat khelh tur an la nei a, zanin dar 9:30-ah Fiorentina an lenchilh ang - league-ah parukna an ni mek a, Mourinho naute tan Europa League kaltlanga season thara Champions League khelh a beiseiawm zawk.