A tawp dan hi a na - Saka, Arsenal forward

Premier League champion nih an tum a, hun rei tak chhung pawh hmahruaitu an ni thei - mahse a tawpah Arsenal beiseina a thamral ta si. Bukayo Saka chuan an hun tawp lam hman dan chu hrehawm a tih thu a sawi.

England international Saka hi Gunners tan player rinrawl a ni a, a mawhphurhna pawh a hlen ṭha viau. Mahse, season tawp lamah amah leh a team an zuih. West Ham laka penalty a hlah chu point an hloh chhan langsar tak a ni bawk.

Tun season EPL match zawng zawng la khel vektu Saka chuan, "A na takzet, season tawp kan hman dan hi tawrh thiam pawh a harsa ka ti hle. A bik takin a tir aṭanga kan hun hman dan zawng zawng chhutin hriatthiam pawh a harsa," a ti.

Kum 21 mi Saka hian season a hmang ṭha a, hei vang hian mimal chawimawina dawng thei tura rinkai zingah pawh a tel. Mahse, a tawpah erawh Manchester City leh Erling Haaland chu chu team leh mimal chawimawina lamah pawh an tluk ta lo.

Man City striker Haaland hi Football Writers' Association's Footballer of the Year atan thlan a ni a, vote tla zinga 82% zet a hmu. A hnungah hian Saka leh Arsenal captain Martin Odegaard te an awm.

Season hmasa lama Arsenal Player of the Season lawmman pawh lo dawng tawhtu Saka chuan, "Hun harsa a lo thleng a, lawmna leh phurna reng reng kan neih loh hun a lo thlen chiah khan engtianga hmachawn dan tur nge pawh kan hre lo.

"Kan hun tawn aṭang khan thil tam tak kan zir chhuak, tunah chuan kawng dik zawh dan pawh kan thiam tawh ang. Player naupang tak tak awmkhawm kan ni a, hlawhtlinna chan châka tuihal kan ni - Arsenal tan kan la hlawhtling ngei ang," a ti.

North London club hian EPL match 37 aṭangin point 81 an hmu tawh a, season hmasa lama an hmuh (69 points) chu an khum chiang tawh hle. Pathianni zan dar 9:00 hian season khar nan Emirates Stadium-ah Wolves an mikhual ang.