French Open Djokovic leh Alcaraz inhmachhawn thei dawn

Tennis inelna lian French Open chu Pathianni tlai aṭangin khelh ṭan a ni dawn a, champion tura rinkai pahnih Novak Djokovic leh Carlos Alacraz te chu an kaltluang zel a nih chuan semifinal-ah an inhmachhawn thei dawn a ni.

Ningani zan khan French Open 2023 inkhel tur hi pawh niin, world number 1 Alcaraz chuan a match hmasa berah qualifier aṭanga invaw kai a hmachhawn dawn. Spanish tlangval hian season hmasa khan US Open nomawi a chawi a, title lian pahnihna lak a tum dawn.

New York khawpuia hlawhtlinna a chan hnu khan Alcaraz hi hliamin a tibuai zui a, hei vang hian Australian Open pawh a khel thei lo. Grand Slam champion a nih hnuah tun ṭum hi major tournament a khelh lehna hmasa ber tur a ni ang.

Djokovic chu player dang ang bawkin world ranking lama a dinhmun angin seeded pathumna pek a ni a, a match hmasa ber atan Pathianni zanah American player Aleksandar Kovacevic nen an inhmachhawn dawn a ni.

Serbian star Djokovic hian Grand Slam nomawi 22 a la tawh a, major title lak hnem lamah Rafael Nadal nen an intluktawk mek. Kumin French Open-ah hian Nadal chu hliam vangin a inlan thei dawn lo.

Vawi 14 champion tawh Nadal a inlan theih dawn loh avangin player dang tan nomawi chawi theihna remchang a inhawng zau dawn tihna a ni a, chuvangin Djokovic tan Grand Slam title nei hnem ber nih fal theihna remchang a ni ang.

Champion erawh thil awlsam a ni dawn bik lo - Australian Open 2023 hnuah Djokovic hian tournament pali a khel leh tawh a, a la champion miah lo. A kalkawngah Alcaraz a awm theih bawk avangin hna a hautak chho dawn hle.

Djokovic leh Alcaraz te intawn hnuhnung ber chu Madrid Open 2022 semifinal kha niin, kum naupang zawk Alcaraz-a'n set a hloh hmasak hnuah hnehna a chang. Season hmasa final-a chak lo zawk Stefanos Tsitsipas pawhin Jiri Vesely hmangin bul a ṭan thung ang.

Daniil Medvedev pawh dah hniam a rem lo. Season dangah chuan Russian tlangval hi clay court-ah chuan player huphurhawm lo tak a ni ṭhin, kuminah erawh thawnthu a danglam mek - Italian Open champion a ni thei a, inelna lianah pawh a tawh a khirh dawn.

Hmeichhe singles lamah champion lai leh seeded pakhatna ni bawk Iga Swiatek chuan a bul ṭan nan world number 67 Cristina Bucsa a tum dawn. Seeded pahnihna Aryna Sabalenka leh Wimbledon bakah Italian Open title latu Elena Rybakina te chu mipui ngaihven bik an ni ang.