Thla ruk chhungin chi inthliarna kan um bo ang - La Liga President
Real Madrid forward Vinicius Jr chunga vun rawng vanga inhmuhsitna thleng chuan football khawvelah boruak a neih chhunzawm zel a, twitter lama Vinicius nena lo inhnial tawh, a hnua ngaihdam diltu La Liga president Javier Tebas chuan thla ruk emaw thla sarih chhunga chi inthliarna an um bo theih a rin thu a sawi - thuneihna sang zawk pek a phut thung.
Tebas chuan, "Kan beisei anga thuneihna sang zawk pek kan nih chuan thla rei lotê chhungin heng buaina zawng zawng hi kan um bo theih ka beisei a ni," a ti a, "Chutianga thuneihna pek kan nih chuan Vinicius chungchangah ngei pawh hmasawnna a awm lehzual thei ang. Thuneihna pek kan nih loh chuan kan tih theih awmchhun chu complaint thehluh hi a ni ringawt," a ti a, an thuneihna chu beitham a ti.
Vinicius hian tun season-ah vun rawng vanga hmuhsitna a tawk nasa a, Valencia nena an inkhelh ṭuma fans ho au elna avangin tun hnaiah boruak a nei lian lehzual - Nilaini zana Real Madrid leh Rayo Vallecano inkhelhnaah pawh Vinicius thlawpna player leh fan ten nasa takin an lantir a ni.
Tebas chuan Vinicius khan inkhelh laia khelmual chhuahsan duhna thinlung nei ta se, a thlawp tur thu sawi zuiin, La Liga President chuan, "Thil thlengin a tibuai a, inkhelh laia khelmual chhuahsan duhna thinlung a nei a nih chuan ka pawm thlap.
"Amah mai ni loin, team pumpui khan lungawi lohna lantirin khelmual kha chhuahsan ta se, ka thlawp ang. Mahse, khelmualah referee-in thutlukna a siam tawh - inkhelh lai khan chhuak ta pawh ni se, keima mimal bakah La Liga pawhin kan thlawp ang," a ti a, Brazil international chu a thlawp tlat thu a sawi.
Tebas chuan Vinicius chunga chi inthliarna thleng chungchangah complain pakua lai an siam tawh thu a sawi a, mahse, Spanish dan hnuaiah hremna engmah an lekkawh thei lo - an tih theih chu thil thleng finfiah a, report pek a ni.
La Liga President chuan, "Thuneihna sang zawk kan duh. Chi inthliarna thleng ṭhin avanga buaina chungchangah parda phena bihruk reng kan duh lo. Complain siam theitu nih ringawt hi kan duhtawk lo a, chi inthliarna lam hawia chete reng reng hrem theih hi kan duh chu a ni," a ti.
Tebas chuan sawi chhunzawmin, "Khelmualah hetiang thil hi a thlen nawn fo loh nan theihtawp kan chhuah zel ang. 100% tawpa um bo chu rukrukna leh sual dangte 100% a kan um bo thei lo ang tho hian a theih kher lo ang. Mahse, thuneihna hi pek ni ta chiah ila, thla ruk emaw thla sarih hnuah emaw chuan chi inthliarna awm tawh loh thu kan sawi thei ang," a ti a, an hmalak theihna chin chu a duhkhawp lo hle.
La Liga hian Spanish sorkar hnenah thuneihna sang zawk pe tura ngenna an thehlut tawh a, stadium kharsak, fan-te inkhel en thei loa hrem leh sum leh pai chawitir thei tura thuneihna sang zawk neih ve an duh.
Tun dinhmunah chuan La Liga hian khelmuala chi inthliarna, tharum thawhna leh ram dang mi laka hleihlenna thleng emaw awm thei chungchangah kar tinin Spanish Football Federation (RFEF) hnuaia Competition Committee leh State Commission hnenah report a thehlut ṭhin.
'Hate crime' (chi bing/sakhua inhuatna avanga hleihlenna) tia sawi theihte chu heti lam buaipuitu sorkar dan hremite hnenah an thehlut ṭhin bawk a, Valencia leh Real inkhela thil thleng pawh kha 'hate crime' tiin report a ni.
Hetihlai hian European football-a inthliarna dotu pawl FARE hotupa Piara Powar chuan, "Tebas-a thusawi hi ka pawm lo. League thuneitu an nihna angin tihtheih chu an ngah tawk tawh," a ti a, La Liga club-te chu an thuhnuaia awm vek an nih avangin zirtirna leh thildang tam tak an pek theih thu a sawi.
Powar chuan, "Tuna a thusawiah pawh Spanish football mi leh sa zawng zawngin Vinicius thlawp a ṭul thu leh hetiang thil a thlen nawn loh nana hmalak ho a ṭul thu a sawi awm hriat tur a awm lo a, a thusawi hian min hneh lo - midang pawh chutiang tho chu an ni ang," a ti!
Thil thlen dan
21 May 2023
Valencia nen an inkhelh ṭumin Valencia fans ṭhenkhatin Vinicius chu chi inthliarna lam hawiin an au el a, minute 97-naah Vinicius zawk hi Hugo Duro nen an intihbuai avangin hnawhchhuah a ni - Vinicius hian inkhel tir lamah fans ṭhenkhat, amah au nawmnahtute chu a hmachhawn bawk.
Inkhelh zawhah Vinicius leh Tebas te chu twitter lamah an inhnial zui. Vinicius hian inkhelh zawhah, "La Liga hi chi inthliarna thlawptute tan hmun nuam a ni," tiin a sawi a, hei hi Tebas chuan chhangletin, "Inzir deuh i ngai a ni," a ti a, chi inthliarna dona kawnga an hmalaknaah Vinicius chu koh a ni ṭhin chungin, vawi hnih ngawt a kal thei lo, niin a sawi.
22 May
Real Madrid chuan Spanish dan hremite hnenah Vinicius chunga thil thleng chu 'hate crime' (chi bing/sakhua inhuatna avanga hleihlenna) tiin an report.
23 May
La Liga chuan thuneihna sang zawk pek an duh thu an sawi a, hetihrual hian Valencia pawh sum chawitir niin, an stadium-a ṭhutna ṭhenkhat chu kharsak an ni.
24 May
Tebas-a'n Vinicius nena an buaina chungchangah ngaihdam a dil a, Real Madrid leh Rayo Vallecano inkhelah Real player, staff leh fan ten Vinicius an thlawp thu nasa takin an lantir.