Bundesliga an chingfel dawn
German rama football inelna sang ber Bundesliga 2022-23 season chu zanin hian chinfel a ni dawn. Dar 7:00-ah team zawng zawngin an match hnuhnung ber chu a rualin an khel dawn, champion tur a chian dawn chauh avangin a boruak a nung khawp ang.
Bundesliga a nih chuan champion turin Bayern Munich buk a rit a, an champion leh nge nge ṭhin. Mahse, tun season chu Bavarians tan thil a awlsam bik lo - zanin atan chuan engkim hi Borussia Dortmund kuta innghat a ni. Signal Iduna Park-ah Bundesliga nomawi (original) an dah ang a, Bayern inkhelhna tur RheinEnergieStadion-ah nomawi anpui (replica) an dah thung dawn.
Dortmund hian Mainz an mikhual dawn. Mipui 81,365 lenna Signal Iduna Park chu a khat hneh mep mep khawp ang, mikhual tana lenluh chakawm lohna hmun a ni a, an mikhual tur Mainz tan Dortmund fans an tawrhhlehawm dawn.
Dortmund coach Edin Terzic chuan, "Tun ṭum kan match khelh turah hian thil mak leh ropui tak tih a ngai hran lo, kan khelh dan phung pangngaiin nuamti taka kan khelh chhuah theih ka duh ber, thil dang a ngai lo.
"Fans lamin nasa takin min pui dawn, khelmual luh hma aṭangin a boruak a nung hle ang," a ti a, a naute zingah tawnhriat nei tlem deuh an la awm tih a pha lo a, chung mite fuih leh puih chu a hna a ni tih a sawi bawk - an hun ṭha bik neih bawhpelh an tum lo.
Champion lai Bayern Munich lamin beisei an la nei ve bawk, an mikhualna rama Cologne hneh chu an tih theih awmchhun a ni thung. Thomas Tuchel-a naute tan champion tur chuan chak ringawt a tawk lo, inkhel dangah Dortmund lamin point an hloh tel a ngai.
Bavarians hian a zawnin season 10 chhung chu Bundesliga title an la thei. Tun season an hmang ṭha tawk lo a, coach Julian Nagelsmann banin tun hma lama Dortmund enkawl tawhtu Tuchel an ruai.
Nagelsmann an pet chhuah lai hian Bundesliga hmahruaitu an ni a, Champions League-ah hneh loh nei loin last 16 an lut. Mahse, Tuchel awm chinah UCL aṭangin an tla a, league nomawi an kawl lai an hloh zui a nih chuan club thuneitu lamin an lu thak lo pui an hiat an hiatin a rinawm.