Celtics an la tlawm bik lo

Boston Celtics chu Miami Heat lakah an la tlawm mai duh bik lo. Nimin zing NBA Eastern Conference Finals game 5 inkhelah Celtics hian an mikhual Heat hi 110-97 in an lo hneh.

Game hmasa pathumah Heat an chak vek a, seeded hniam ber ni chungin conference champion an ni tlang nghal teuh hle. Mahse, game hnuhnung pahnihah Boston Centics an chak ve thung, best of seven series khelh turah Heat hi 3-2 in an chungnung mek.

May 28, Pathianni zing dar 6:00-ah game 6 an khel dawn, an inkhelhna tur hi Heat khelmual FTX Arena a ni dawn. Erik Spoelstra-a naute hi anmahni mualah an chak thei a nih chuan game 7 khelh hah ngai loin NBA Finals an lut ang.

Nimin zing inkhelah khan Boston hi chak lo ni se la chuan an zinkawng a tawp ang. Mahse, hun pawimawhah Jaylen Brown (21 points), Derrick White (24), Marcus Smart (23) leh Jayson Tatum (21) te an khel ṭha rual vek, an khingpui lam tan ven ber tur pawh hriat a harsa.

Jaylen Brown chuan, "Kan chak loh ṭhin chhan chu keimahni khelh fuh lo vang zel a ni, match hnuhnung pahnihah chuan duhthusama ṭhain kan khel thei. Hetiang hi game 6-ah pawh kan khelh leh theih ka beisei," a ti.