Spurs-in Boro hneh hram

Thawhlehni zan khan FA Cup third round replay khelh a ni a, Tottenham Hotspur chuan Middlesbrough 2-1 a hnehin fourth round an thleng.

Inkhel dangah Newcastle United-in Rochdale lakah harsatna an tawk nawn lo a, 4-1 in an chak. Shrewsbury Town, Coventry City leh Reading ten an khingpui Bristol City, Bristol Rovers leh Blackpool ṭheuh an hneh bawk. Tranmere leh Watford te inkhel tur erawh ruahsur nasat avangin sawn a ni a, January 23, Ninganiah 'third round replay' hi an khel chauh dawn. Heta chak zawk hian nizana Manchester United leh Wolverhampton Wanderers chak zawk an hmachhawn ang.

Tottenham-in an mualah bul an ṭan fuh a, minute hnihna lekah Boro goalkeeper Tomas Mejias-a'n defender pass a tum chu Giovani Lo Celso tlazep hmanin Argentine midfielder hian ṭha zetin a pet goal nghal. Minute 15-naah Erik Lamela-a'n a thiamthil lantirin Boro tlarhnung a tlanpelh hnuah cool takin a khung. Mual sira awm Jose Mourinho a inhrosa ṭan a, chak tur a chiangah a ngaih theih. Amaherawhchu minute 75 khelh tur a la awm miau avangin rinlawk ang ngawt a ni ta lo.

Spurs-in inkhel thununin chance pawh insiam hnem mah se goal an khung tawh lo. Minute 83-naah Boro midfielder George Saville chuan box pawn aṭangin goal ṭha zet a khung a, 2-1 a nih tak avangin hun tawp hma thlengin Mourinho hote nuam sain an awm lo.

Tottenham boss Jose Mourinho chuan, "Goal thumna kan khung teuh ṭhin hle. Halftime-ah pawh goal kan khung lo a nih chuan a harsa dawn tih ka sawi lawk a, a tawp lamah harsatna kan tawk. Goal kan chhuah kha pawi ka ti a, chu aia pawi zawk chu goal thumna kan khung thei lo kha a ni," tiin chance an hlah hnem vanga khingpuite beiseina an siam thu a sawi.

Middlesbrough manager Jonathan Woodgate chuan, "Chak loh hi ka duh lo a, an goal hmasa ber pawh kha an tih ṭhat vang ni loin kan tihsual vang a ni. Chutihrualin hun tawp thlenga kan khelh dan khan minti lawm. Kan rilru a huaisen a, club tan kan theihna zawng zawngin kan khel a ni," tiin a sawi. Fourth round chu January 24-28 hian khelh a ni dawn a, Spurs hi Premier League club Southampton hmachhawn turin St Mary's Stadium-ah an lenglut ang.

January 22, Nilaini

Tottenham Hotspur    2 - 1    Middlesbrough

TOT : Giovani Lo Celso 2'; Erik Lamela 15'

MID : George Saville 83'

Newcastle United    4 - 1    Rochdale

NEW : Eoghan O'Connel 17' (OG); Matty Longstaff 20'; Miguel Almiron 26'; Joelinton 82'

ROC : Jordan Williams 86'

Shrewsbury Town    1 - 0    Bristol City

SHR : Aaron Pierre 89'

Coventry City    3 - 0    Bristol Rovers

COV : Maxime Biamou 4', 56'; Josh Pask 50'

Blackpool    0 - 2    Reading

REA : Lucas Boye 42'; Jordan Obita 82'

January 23, Ningani

Tranmere Rovers    1:15 AM    Watford