Bayern lawmna a sang, Dortmund tawrhna a na mah mah!

Inrinni zan khan Bundesliga-a Bayern Munich rorelna a tawp tura ngaih a ni a, Borussia Dortmund hun a inher chhuak ve tura ngaih a ni. Amaherawhchu season dang ang thoin tun season-ah pawh Bavarians pualin champion thawnthu ziah a ni a, a tawpah Bayern Munich bawk an champion.

Dortmund-in an mual Signal Iduna Park-ah Mainz an mikhual a, champion turin chak a tawk. Bayern erawhin hnehna an chang a nih pawhin Dortmund chetsual an ngaihchan tel a ṭul.

Jamal Musiala-a'n minute 89-naah Bayern chakna goal a khung a, RheinEnergieStadion-ah 2-1 in hnehna an chang. Cologne aṭangin Bayern-in Dortmund result an ngai chang a, Niklas Sule-a'n injury time-ah goal pawimawh khung mah se siphurh sutna chauh a nih avangin Mainz nen 2-2 in an inhnehtawk. A zawna a vawi 11 nan Bayern-in Bundesliga nomawi an chawi.

Bellingham a tel lo

Borussia Dortmund kutah engkim a awm a, amaherawhchu starting eleven an puanin Jude Bellingham a tel lo. Real Madrid nena sawizawm English midfielder tel lo hi khawvelin mak a ti a, inkhelh banah erawh Edin Terzic-a'n a inhliam thu a sawi. Dortmund vanduai inṭannaah a ngaih theih.

Signal Iduna Park-ah Mainz an che ṭha zawk a, minute 15-na lekah Andreas Hanche-Olsen-a'n corner aṭanga ball kal a tauh lut. Dortmund-in siphurh sutna remchang an ngei nghal a, an penalty hmuh chu Sebastien Haller-a'n a pet goal lo. Haller hian Dortmund tan a vawi khat penalty petna a ni a, tun season-a penalty khung tawhtu Marco Reus leh Bellingham te bench-ah an awm!

Dortmund tlarhnung an muthlu zui a, minute 24-naah Karim Onisiwo-a'n Mainz tan a tauh goal. Mainz striker Onisiwo hi Dortmund defender pahnihin an kar cheh chungin hnaihtu a nei lo a, duh thalin ball a tauh theih a ni.

A awlsam bik lo

Bayern-in Kingsley Coman hmangin Cologne lakah minute riatna lekah an khung a, Mainz-in goal hnih an khung bawk avangin champion turin an dinhmun a ṭha.

Mahse, Thomas Tuchel-a hote an hlauthawng a, goal dang khung turin an nawr na tawk lo. Leroy Sane goal hnihna chu VAR hmanga ennawn a nih hnuah ball-in Sane kut a per avangin pawmsak a ni lo bawk.

Hun tawp dawn hnaiah ball-in Serge Gnabry kut a per a, referee-in freekick pe zet mah se VAR lamin penalty-ah an thlak. Dejan Ljubicic-a'n minute 81-naah penalty hi a khung a, 1-1 a nih tak avangin Dortmund chu table chung berah an awm leh ta thung.

Bayern-in an nawr chiam a, Sane-a'n ṭha taka a khalh luh hnuah keeper Marvin Schwabe-a'n a dansak. Mahse, Cologne-in Bayern an chelh reng thei lo - Musiala-a'n huaisen taka a lakluh hnuah minute 89-naah goal ṭha bik a khung.

Bavarians-in hma an hruai leh ta a, chutihrualin Dortmund-in Raphael Guerreiro hmanga siphurh an sut ṭhen tawh avangin Thomas Tuchel-a hote dinhmun a him lo.

Muller-a phone hmangin Bayern player-ten inkhel an en ṭhup a, Sule-a'n Dortmund tan siphurh sutin 2-2 a ni chiah. Dortmund leh Bayern te point inang mah se head to head-ah Bayern dinhmun a ṭha zawk. Terzic-a hoten chakna leh champion-na goal khung tumin nawr leh chiam mah se goal khungna hman a awm tawh lo.

Bayern player-te tan phone en hman a ni ta lo, champion lawmin fan lamah an tlan phei. Bavarians hi a zawnin vawi 11 an champion-na a ni a, chutihrualin an champion dan a danglam em avangin ṭum dang zawng aiin an lawmah a ngaih theih. Bayern lawmna a sang, Dortmund tawrhna a na mah mah!

Pa vanduai Reus: 

Marco Reus hi khawvela footballer talent nei ṭha ber zinga mi a ni a, mimal chawimawina ṭhahnem tak a dawng tawh. Reus hi Borussia Dortmund youth system chhuak a ni a, Rot Weiss Ahlen leh Borussia Monchengladbach-ah intat hriamin kum 2012 khan a pianna khaw club Dortmund-ah a kir.

Reus hi player ṭha Robert Lewandowski, Mario Gotze, Ilkay Gundogan, Pierre-Emerick Aubameyang, Ousmane Dembele leh Erling Haaland ten Dortmund an chhuahsan hnuah pawh a chhuak duh lo a, tun season-ah a vawi khat nan league nomawi a chawi tura ngaih a ni. Mahse, World Cup-a Germany an champion ṭuma inhliam vanga tel lo Reus a vanduai leh a, yellow wall (Dortmund ṭantute) hmaah a mittui thup seng a ni lo. Rilru na takin khelmual a chhuahsan a, Dortmund captain hian khawngaihtu pawh a ngah hle.

Kahn leh Brazzo an ban: 

Bayern-in Bundesliga nomawi chawi tho mah se, club thuneitute lawm a kim chuang lo. Treble champion an nih theih laia Julian Nagelsmann bantu club CEO Oliver Kahn leh sporting director Hasan Salihamidzic (Brazzo) te chu inkhelh zawh hmain an ban.

Kahn-a hmun ruak hi Jan-Christian Dreesen-a'n a luah dawn a, Bayern CEO thar Dreesen hian kum 2013 aṭang khan Bayern-ah hian finance officer hna a thawk tawh. Brazzo thlaktu tur erawh an la puang lo.

Bayern legend Kahn chuan, "Ka ruahman dan chuan Cologne-a zin a, team nena champion lawm a ni. Mahse ka kal an remti lo," tiin a sawi. Club hotuten Kahn hi team zinga a tel an remti lo a, Bayern leh Cologne inkhel pawh hi a hmunah a en lo a ni.