Zaninah CYMA Football last 32 khel tur hriat dawn

LBS Suzuki 21st Inter Branch YMA Football Tournament-ah vawiin hian last 64 khelh zawh a ni dawn a, inkhel tur pawh a hmuhnawm dawn. Zanin dar 8:30 hian last 32 draw neih a ni dawn a, LPS Channel 1 leh LPS YouTube channel-ah live telecast a ni ang.

Salem Veng Vs Farkawn

All Mizoram Inter Village Football Tournament-ah khan Farkawnin Salem Veng an barakhaih a, RG Stadium-a Salem Veng ṭantu ṭhahnem tak hmaah Farkawnin penalty shootout hmangin an hneh.

CYMA Football hma hian tun ṭuma Salem Veng enkawltu Rindika Hmar chuan Farkawn a enkawl a, Tuipuiral inelnaah a champion pui. Farkawn hian player ṭha an neih belh a, India aiawha khel tawh Jerry Lalrinzuala chu captain niin player ṭha rual awmna Salem Veng nen pawh an intluktawk. Chawhma dar 9:30-a 1st Bn. MAP Ground-a inkhel tur hi boruak a sang dawn.

En châkawm dang

Lammuala Kawnpui Jt leh Sialhawk inkhel tur hi inkhelh hma hauhin boruak a sang a, Kawnpui tlangval Albert Zohmingmawia'n Aizawl FC tana a khelhpui ṭhin R. Laldanmawia telna Sialhawk a hmachhawn tur hi en a châkawm.

Football thiam veng Dinthar an inlan dawn a, CYMA Football-a vawi hnih champion tawh Dinthar hian Sihphir an hmachhawn dawn. YMA Mission Vengin goal 13 ngawt khung thei Chanmari West an hmachhawn dawn bawk.

Player nei ṭha zingah Durtlang an tel a, khelh dan mumal nei Tanhril hmaah fiahna an hmachhawn ang. Ramhlun North hi Inter Village Football 2022 aṭang khan dah hniam theih an ni lo a, Zuangtuiin goal venhim hna an thawk lo a nih chuan goal chhuah tam thei dinhmunah an ding.

Muallungthuah team ṭha zinga mi Bawngkawnin Khawlailung an hmachhawn dawn. K. Malsawmkima enkawl Bawngkawn khingpui tur Khawlailungah hian Delhi FC I League kaipuitu Vanlalhriatzuala (MPL best midfielder) an chhawr thei tawh dawn. West Lungdar leh Tlangnuam inkhel tur pawh hmuhnawm tura ngaih a ni.