Premier League khel tur Luton Town

Kum kua liam taa non-league la khel Luton Town chuan season thar aṭangin Premier League an khel dawn - Championship playoff final-ah Coventry City an hneh a, season tharah English top flight league an khel dawn.

Wembley Stadium-a inkhelah Luton tan Jordan Clark chuan minute 23-naah goal hmahruai a khung a, Coventry-in Gustavo Hamer hmanga chhangletin, hun tawp thlengin goal dang a lut lo.

Minute 120 chhung goal dang a luh theih miau loh avangin penalty hmanga chak zawk zawn a ni zui a, penalty lamah pawh an inhnehtawk rei viau - mahse, penalty 12-na chu Coventry right back Fankaty Dabo chuan a thlawh over a, 6-5 in Luton an chak.

Season tharah fans 10,356 lenna khelmual Kenilworth Road neitu Luton-in Premier League an khel dawn a, Arsenal, Liverpool, Manchester City, Manchester United leh Chelsea te nen an inkhel ho tawh dawn!

Harsatna ruam

Wembley Stadium-a inkhelah Luton hi an talbuai teuh hle - minute 12-na lekah captain Tom Lockyer chu khelmual chhungah a tlu a, damdawi in lama hruai a ngaih zui avangin thlak a ngai.

Defender pawimawh ni satliah lo, captain dinhmun hial chelhtu chu inkhel ṭantirah an chân a, team tam tak talbuai hun a ni. Mahse, Luton-in huaisen takin an bei chhunzawm a, a tawpa an lawmman chu Premier League khel tura inpetttling a ni.

Luton hi an vanneih zan ni se, penalty pet kher ngai lo a, tlang thei tur an ni hial. Mahse, chance tam tak an hlah bakah an goal khung pahnih chu pawmsak an ni lo a, an vanduai zawk, tiin a sawi theih hial.

Inkhelh zawhah Luton player-ten Lockyer kawr keng lang chungin an captain an hre reng tih an pholang a, Wales international hi damdawi in thlenpui a nih hnuah a ngaihtuahawm lo, niin an sawi.

Stadium thar a ngai

Luton Town-in Premier League an khelh dawn avangin a lo berah pound maktaduai 170 vel talin an hausak belh tura ngaih a ni a, mahse, he club tenau hian Premier League club liante el phak turin inthuamthar an mamawh nasa.

An khelmual Kenilworth Road hi thuam ṭhat ngai hmasa a ni a, tuna a awm ang hi chuan Premier League tehna aṭangin English top flight league khelh nan a tlak lo - pound maktaduai 10 tal an sen belh a ngai dawn.

Luton khelmuala lut tur hian ṭhenawmte huan paltlang chunga luh a ngai a, hei ringawt pawh hi luhka nuam zawk awm tura an thuam ṭhat a ngai dawn - mahse, heti chung hian an stadium hi an zauh viau a nih loh chuan Premier League-a stadium tê ber a ni rih dawn.

Mahse, khelmual dang an ngai bik lo. Luton tana goal khungtu Jordan Clark chuan, "Khelmual nuam tak a ni a, season tharah he hmuna khelh hi ka châk tawh hle - team inpawhtlang tak kan ni a, he team tana ka khel thei hi ka inchhuang a ni," a ti.

Thawnthu hlui

Kum 2009 khan League Two aṭangin Luton Town hi an tla thla a, khatihlai kha chuan Premier League kai chu vana rah ang hial a ni. Mahse, kum 2014 khan coach John Still kaihhruaina hnuaiah League Two an inpetkai.

Still hian beisei anga a chet ṭhatpui zui loh avangin an ban a, Nathan Jones an lalut. Welsh coach hian League One leh Championship a hruai thlen hnuah Stoke City enkawl turin a chhuahsan a, May 2020 khan Luton-ah bawk a kir.

Luton hi Championship playoff semifinal hial khelhpui mah se, Premier League an inpetkai zo lo a, Jones hian November 2022 khan English top flight league club Southampton a zawm zui - mahse, Saints-ah hian league match riat aṭangin vawi khat chiah a chak a, an ban.

Thil mak ve tak chu, Jones-a'n a vawi hnih nana a chhuahsan hi Luton tan malsawmna a chang - an hmelma kumhlun Watford duh loh hnu, September 2022-a an ban Rob Edwards chu Luton coach ni turin November 2022-ah vek an lalut.

Thawnthu ngaihnawm

Kum 40 mi Edwards hian kum 2013 khan kum 30 mi lek niin inkhelh a chawlhsan a, Wolverhampton Wanderers-ah Under-18 coach ni chungin a coaching career a ṭan - Wolves-ah hian manager lailawk hnate pawh a chelh a, non-league club AFC Telford United a enkawl hman bawk.

July 2018 khan Wolves U23 coach tura ruat niin, youth football-a division sang ber Premier League 2 Division 1 a hruai thleng a, October 2019 khan Wolves chhuahsanin England U20 coach atan ruat a ni a, September 2020 khan England U16 a enkawl zui.

A bul ṭanna tê mah se a hna-thawhin Edwards a chawi sang a, March 2021 khan League Two club Forest Green Rovers a enkawl ṭan. A season hmasa berah Forest Green chanchina a vawi khat nan League One khel turin a tlinpui.

May 2022-ah Watford a zawm zui a, beisei ang result a neih loh hnuah an ban. Mahse, Watford thutlukna hi Luton vanneihna a chang a, kum 40 mi lek coach hoin Premier League an inpetkai ta der.

Sawi tur a tam

Luton Town chanchin hi ziak vek dawn ila, ziah vek sen a ni lo - club tenau tak ni chunga Premier League khel tura an inpetkai maite hi thil mak a tling a, coach Edwards chuan Luton a enkawl thei chu a inchhuan thu a sawi.

Player a nih laia Wales tana vawi 15 inlan Edwards chuan, "He club-a ka awm ve thei hi ka hlim takzet a, players, staff, board leh min ṭantute pawhin hlim taka kan hlawhtlinna lawm hi an phu - an paltlang hnem em a ni," a ti thlawt.

Hatters (Luton sawina) chief executive Gary Sweet chuan "Hei hi kan tawpna tur a ni lo," a ti a, kum 2008 lawka tihtawp theih dinhmuna ding hial club chuan hmalam an pan zel tur thu a sawi.

Sweet chuan sawi zawmin, "Ka lawmna hi a luangliam a ni. Kan awm duhna taka kan awm thei hi ka awih lo hial zawk - hei hi hriatreng tur chu a ni," a ti a, "He club leh khawpui hi a zamral ka phal ngai lo. Tunah chuan a sang zawngin hma lam kan pan zel a, hei hi kan thawnthu tawpna tur a ni lo," a ti bawk.