Messi-a goal hmangin PSG an champion

Lionel Messi chuan Paris Saint Germain chu Ligue 1 champion a nih pui a, Argentina captain hian European League lian zuala goal khung hnem lamah Cristiano Ronaldo a kalsan ta bawk.

Strasbourg mualah PSG hian point khat an mamawh, second half minute 59-naah Messi chuan Kylian Mabappe siamsak hmangin a khung a, box chhunga a ball dawn chu angle zim tak aṭangin a khung. Mualneitu lamin Kevin Gameiro hmanga sutin 1-1 ni mah se PSG tan point khat hmuh a tawk.

Messi hian European League lian zual panga aṭangin goal 496 a khung tling ta a, tun hma lama record inṭawm a lo neihpui Ronaldo a kalsan - Portugal captain hi Asia lamah a inkhelh tawh avangin Europe-ah a kir leh a nih ngawt loh chuan lehthal leh theih a ni tawh lo.

Kum 35 mi Messi hian PSG tan bik goal 32 a khungsak ta a, tun season tawp ruala chhuah a tum avangin Paris club tana a goal khung hnuhnung ber pawh a ni nghal mai thei, match khelh hmabak pakhat erawh an la nei.

Messi hma hun a chiang lo a, ani ang bawkin coach Christophe Galtier chu season tharah PSG enkawltu a ni chhunzawm dawn em tih a chiang lo. Galtier chuan, "European League hrang hrang en ila, champion lai tan nomawi humhim a awlsam lo vek.

"Keini tan pawh thil awlsam a ni bik lo, chuvangin Ligue 1 champion kan ni leh thei hi kan lawm tur a ni," a ti. PSG hian league nomawi 11 an nei dawn ta a, record hmasa an inṭawmpui Saint-Etienne leh Marseille te an kalsan a ni.