MFA-in ground puitling siam turin sorkar ngen dawn

Mizoram Football Association chuan May 26, Zirtawpni khan Aijal Club-ah Annual General Body Meeting an nei a, District Football Association 11 aṭangin palai an kal. Mizoram sorkarin football khelmual artificial turf phah ṭhahnem tak an phah avangin MFA an lawm a, chutihrualin minimum international standard size (100m x 64 m) tling ngeia siam turin sorkar ngen an tum.

Mizoram sorkarin ground a phah thar zinga mi 1st Bn MAP Ground, Armed Veng chuan minimum international standard size hi a tling lo. Hei bakah hian ground phah tura hmalakna awm mek Chite Ground, Edenthar leh Zarkawt a ground phah thar turahte pawh minimum international standard size hi tling pha lo tura ngaih a ni bawk.

MFA chuan an thu pawm zingah Mizoramah international football match khelh theihna tur 'natural grass' awmna khelmual siam turin sorkar ngen ni se, tih a tel. AIFF president Kalyan Chaubey leh secretary general Shaji Prabhakaran ten Mizoram an rawn tlawh ṭumin Mizorama international match khelh theihna a awm phawt chuan hmalak an inhuam thu an sawi a, tun dinhmunah erawh international match khelhna tlak Mizoramah a awm lo.

MFA thu pawm dangte chu

Player inziah luhna AIFF Centralised Registration System hman a nih hnuah registration leh transfer chungchangah Mizoram mil turin state chhunga hman tur bîk MFA-in duang rawh se.

2023 -24 season-ah heng inelna hi kalpui a ni ang - MFA Cup, Inter District Junior Football Championship, Inter District Women's Championship. MFA Cup hi Lawngtlai DFA-in a thleng ang a, inelna dang pahnih thlengtu tur hi MFA-in a ruat ang.

MFA hnuaia District FA inelna hrang hrang thlen dan hi a inchhawka (rotation) kalpui tawh tur a ni a, a thlengtu ṭanpuina pek ṭhin chu MFA-in tipung tura rel a ni.