UCL khel turin Inter an tling

Inter Milan chuan Napoli leh Lazio te hnung zuiin Serie A aṭanga Champions League khel turin an tling chiang ta. Tun season atan European football inelna sang berah hian final an lut tawh bawk - Manchester City nen nomawi an inchuh ang.

Inrinni zan Serie A inkhelah Inter hian Romelu Lukaku, Nicolo Barella leh Lautaro Martinez te goal hmangin an mikhual Atalanta chu 3-2 in an hneh a, mikhual goal pahnih hi Mario Pasalic-a khung leh Andre Onana-a'n anmahni lama a tih luh a ni.

Simone Inzaghi naute hian league match 37 aṭangin point 69 an hmu a, pahnihna dinhmun an luah - pangana Atalanta tan khelh hmabak pakhat la awmah umphak theih an ni tawh lo. Nizan khan AC Milan an inlan a, point khat lek an hmuh belh a nih pawhin a sang zual pali tur a chiang tawh ang.