Boston Celtics leh Heat intluktawk ta

Second hnuhnung ber a chet ruala Derrick White-a basket neih hmangin Boston Celtics chuan Miami Heat 104-103 in an hneh a, tunah zet chuan tu zawkin nge NBA Finals lut dawn sawi theih a ni ta lo.

NBA Eastern Confe-rence Finals game hmasa pathumah Heat an chak vek a, 3-0 in hma an hruai. Mahse, tun hnaiah a zawnin Boston hi vawi thum an chak ve thung, 3-3 a ni ta chiah. Thawhlehni zing dar 6:00-ah game 7 an khel ang - a tlang tur zawl an chingfel dawn a ni.

NBA playoff chin hi best of seven series hmangin a chak zawk an zawng ṭhin, eng team mah hi 3-0 a an hnufual hnuin an la tho chhuak leh thei ngai lo. Tunah chuan Boston hian midang tih theih loh kha tih theihna remchang an nei dawn.

Game 7 khelhna tur hi Celtics khelmual TD Garden a ni dawn, coach Joe Mazzulla leh a nauten beisei an nei sang khawp ang. A chak zawk hian NBA Finals-ah Western Conference champion Denver Nuggets an tum dawn a ni.

Nimin zing Kaseya Center, Florida-a inkhelah hian Heat chu chak zawk tura ngaih an ni a, second thum chauh a awm tawh tihah Heat hian 103-102 in hma an la hruai. Mahse, Celtics lamin basket neih tuma an shot hmasa an hlah hnuin, ball ber hi White chuan chak nan a khung.