Ronaldo-a'n nomawi a chawi dawn lo

Cristiano Ronaldo-a'n Al-Nassr a zawm avangin Saudi Pro League-in ngaihven a hlawh thar a, mahse, Ronaldo-a'n a season khatna chu kut ruaka a khar a ṭul dawn - league-ah Al-Ittihad an champion.

Al-Nassr hian Inrinni zan khan Ettifaq chu 1-1 in an inhnehtawkpui a, Ronaldo-a'n bul ṭan mah se a khelh ṭhat tawk loh avangin lakchhuah a ni hial.

Hetihlai hian an elpui ber Al-Ittihad chuan 3-0 in Al-Feiha an hneh thung a, Romarinho chuan goal hnih khungin Ahmed Sharahili chuan goal khat a thawh bawk - Jeddah khaw club hian point ngain hma an hruai fal zui.

Match khat chiah khelh tur a awm tawh avangin Al-Nassr tan Al-Ittihad hi um phak theih an ni tawh lo a, King Cup leh Super Cup lamah semifinal-ah an tlak tawh bawk avangin Ronaldo-a'n Saudi football-a a season hmasa berah champion nomawi a chawi dawn lo.