Real-in Sevilla an hneh

Sevilla khelmualah Rodrygo chuan goal hnih a khung a, Real Madrid chu an mikhualna ramah 2-1 in hnehna a chanpui - La Liga-ah Barcelona an champion tawh avangin Real tan khelh chhan a tlem a, an tum ber chu an hmelma Atletico Madrid chunga season khar a ni.

Sevilla-in rin loh takin minute thumna lekah goal hmahruai an khung a, Bryan Gil-a shot dan per chu Rafa Mir chuan goal-ah a chantir - mahse, Sevilla-in an beisei goal dang an hmu zui lo.

Minute 29-naah Rodrygo chuan chiang zetin freekick a chhuih lut a, minute 69-naah Toni Kroos-a siamsak chu ṭha taka tlan luhpuiin, Sevilla defender rual ven karah goal-ah a chantir - kum 22 mi forward hian tun season-ah goal 19 khungin assist 11 a nei tling tawh.

Sevilla hian player 10 ni chungin inkhel an khar zui a, Argentine left back Marcos Acuna chu Dani Ceballos laka a chet dan hlauhawm tak avangin minute 83-naah hnawhchhuah a ni - tun season-a red card pali a hmuhna a ni!

He thu buatsaih a nih lai hian Sevilla hi La Liga table-ah 10-na an ni mek a, Nilaini zan Europa League final an khelh hunah AS Roma an hneh a nih loh chuan 2012-13 season hnua a vawi khat nan European football an khel lo ang.