Football thiam veng/khua 32 chauh an dam ta

LBS Suzuki Inter Branch YMA Football Tournament last 64 chu nimin khan khelh zawh a ni ta a, CYMA leh MFA buatsaih inelnaah hian football thiam veng/khua 32 chauh an dam tawh. Last 32 hi May 31, Nilaini hian khelmual paruk - Lammual, RG Stadium, 1st Bn MAP Ground (Armed Veng), MSSC Ground (Muallungthu), MFA Ground (Sairang Dinthar) leh MSSC Ground (Lengpui) ah khelh zawh nghal a ni ang.

Aizawl Dist team 20

Inelnaah hian team 145 an tel a, last 32-ah hian Aizawl huam chhung aṭangin team 20 an la tel. Chung team te chu Armed Veng, Bawngkawn, Bethlehem Vengthlang, Chanmari, College Veng, Durtlang, Electric Veng, Hualngohmun, ITI Veng, YMA Mission Veng, Mualpui, Ramhlun North, Ramhlun Venglai, Republic Veng, Salem Veng, Seling, Sihphir, Thingsulthliah Jt YMA, Tlangnuam leh Venghnuai te an ni.

AMC Area huamchhung bik anga thliar chuan team 17 an la dam a; Sihphir, Hualngohmun leh Thingsulthliah Jt YMA te hi AMC Area pawn an ni thung. Aizawl area chhunga team la dam zingah Armed Veng, Chanmari, Electric Veng leh Republic Veng te chu champion tawh veng an ni.

Team dang 12

Khawzawl District aṭangin Khawzawl Vengthar leh Sialhawk te an la dam a, thawm an nei ring dun hle. Sialhawk hi All Mizoram Inter Village Football hnuhnung bera finalist kha an ni a, tun ṭumah pawh mipui ngaihven zinga mi an ni.

Kolasib district aṭangin Bairabi Joint YMA leh Lungdai te an la dam a, Mamit aṭangin team panga Darlung, Lengpui, Lengpui Model, Marpara leh South Sabual te an la dam bawk. Lengpui hi CYMA Football-a Aizawl pawn aṭanga champion thei awmchhun an ni a, tun ṭumah pawh hian champion rinkai zingah an tel phak.

Saitual District aṭangin Keifang Venglai an la dam a, Serchhip District aṭangin Chalrang leh Thenzawl Joint YMA te an la dam bawk.