Sialhawk, Durtlang, Salem Veng, Ramhlun North leh Bawngkawn an chak

Nimin khan LBS Suzuki Inter Branch YMA Football Tournament-ah team ṭha an inlan a, vawi hnih champion tawh Dinthar chu penalty-ah vanduai mah se team lian dang an chak thung. Champion thei tur zinga mi Sialhawk, Durtlang, Salem Veng, Ramhlun North leh Bawngkawn te an chak vek.

Lammualah Unzi Lasi

Sialhawkin Inter Village Football-a hming an chherna hmunah Kawnpui Jt YMA chu 1-0 in an hneh a, goal awmchhun hi Vanlalchhanpuia khung a ni. R. Laldanmawia captain-na hnuaia khel Sialhawk hi khelmual pawnah an thawm a ring a, khelmual chhung lamah pawh result ṭha an la nei zel.

Football thiam veng tia sawi ṭhin Dintharin penalty shootout-ah Sihphir an hneh lo. Sihphirin India junior team tana khel tawh Isac Zomuanpuia hmangin an khung hmasa a, Dinthar tan veteran striker Samuel Laltlanthanga'n injury time-ah sut mah se penalty-ah Sihphir an vannei zawk.

Chanmari West-in match hmasa berah goal 13 ngawt an khung a, niminah erawh YMA Mission Veng an ngam lo. MSV tan hian R Lalrohlua'n first half-ah goal hnih a khung a, second half-ah goal a lut tawh lo.

Salem Veng 'Comeback'

Farkawn leh Salem Veng ten Inter Village Football-ah boruak an neih sa avangin football ngainatuten an ngaihven. Farkawnin MPL club-a khel thei C. Lalhriatpuia leh C. Ramnunpuia te hmangin goal an khung hmasa. A tawpah erawh coach Rindika Hmar enkawl Salem Vengin goal thumin an chhanglet a, chakna goal hi injury time-a Lalremruata'n hla tak aṭanga a pet luh a ni.

Inkhel dangah player nei ṭha Durtlangin Tanrhil chu 2-0 in an hneh a, Ramhlun North-in Zuangtui 16-0 in an sawp bawk.

Bawngkawn an dingchang

Bawngkawn leh Khawlailung inkhel a hmuhnawm a, inkhelh ṭantirh lamah phei chuan an intluk tawk hle. A tawpah erawh K. Malsawmkima enkawl Bawngkawn an dingchang a, 7-4 in an chak.

West Lungdar leh Tlangnuam pawh an inkhel tawk a, second half ṭantirh lamah 1-1 ni mah se hun tawpah Tlangnuamin 2-1 in hnehna an chang.