Man United ṭantuten Ten Hag an lawm

Manchester United chuan Premier League match hnuhnung berah Fulham an mikhual a, 2-1 in an hneh. Old Trafford-a inkhelah Kenny Tete hmangin Cottagers-in goal khung hmasa mah se mualneitu hian Jadon Sancho leh Bruno Fernandes te goal hmangin an lehthal.

Erik Ten Hag-a hoten hnehna an chan avangin Premier League-ah pathumna ni chungin season an khar a, inkhelh banah Dutch manager hian thu sawiin Old Trafford-a mipui a tiphur hle.

Ajax aṭanga Man United zawmtu Ten Hag chuan player, staff leh fan-te chunga lawmthu a sawi zawhah, "Hei hi ka sawi duh. Game khat khelh tur a la awm a, ka player-te hian Wembley Stadium-a Manchester City kan hmachhawn hunah an theihna zawng zawng an chhuah dawn a, nangni pawhin min thlawp ṭhat a ṭul. Old Trafford-a nomawi hawn leh tur hian chance ṭha tak kan nei a ni," tiin a sawi a, mipui thawm a ṭha hle.

Inkhel entu zinga awm Sir Alex Ferguson pawhin phur takin kut a beng a, fan-te pawh an phur hle. FA Cup final hi June 3, Inrinni zan dar 7:30 hian khelh tur a ni.