A tawp khar fuhtu Granit Xhaka

A bul ṭanna leh a karlak a fuh lo deuh a nih pawhin a hmawr bawkna hi fuh se. Granit Xhaka pawhin hun harsa a paltlang hnuah Arsenal tana a match hnuhnung ber chu duhthusama ṭhain a khel.

Pathianni zan khan tun season atana Premier League match hnuhnung ber khelh a ni a, coach Mikel Arteta leh a naute chuan an mikhual Wolverhampton Wanderers chu 5-0 in an sawp. Xhaka-a'n goal hnih a khung bakah Gabriel Jesus leh Jakub Kiwior ten an khung belh bawk.

Swiss midfielder Xhaka hian tun hma chuan Arsenal captain dinhmun hial a luah tawh, mahse a boruak ṭha loin fans lamin an au el hial. Arteta-a'n Gunners a enkawl tirh khan ani chelh hi hna hmasaah a nei.

Sawiselna leh diriamna karah Xhaka a nghing lo a, huaisen takin a tuar chhuak. Tun season an hman zawh takah ngat phei chuan Arsenal player pawimawh berte zinga mi a ni chiang hle, inkhel khaikhawmtu pawimawh a ni bawk.

Journalist lar leh rintlak Fabrizo Romano-a'n a sawi dan chuan, tun season tawp rualin Xhaka hian North London club a chhuahsan dawn - Wolves laka a inlan kha Gunners tana a match hnuhnung ber a ni.

Arsenal manager Mikel Arteta chuan, "Granit Xhaka khan a hna tlin takin a thawk, tun match atan chauh ni loin season tluanin hna ṭha takin a thawk a ni. Kan tana mi pawimawh a ni a, thawnthu ngaihnawm tak neitu a ni bawk.

"Club tana ṭha ber tura thutlukna siam hi ka hna a ni a, kan zavaia ṭhatna tur pawh a ni. Club tana hlawhtlina chan châkin kan tuihal a, player leh coaching staff chauh ni loin fans lam thlengin kan ṭangrual, kan tum ram chu kan la thleng ngei ang," a ti.

Gunners hian hun rei tak Premier League hma hruai mah se an champion ta lo. Champions League erawh an khel dawn a, European football inelna sang ber an khelh dawn avangin nipui bazarah an squad tichak thei tur player an melhin a rinawm.