Mangṭha Foxes & Leeds - Everton an him

Premier League thawnthu ngaihnawm ziak a, beiseina nei lote tana beiseina siamsaktu, thilmak hi a lo awm ngei a ni tih a taka lantirtu Leicester City chuan season tharah Premier League an khel dawn ta.

Claudio Ranieri-a'n, "Sumin engkima ro a relna khawvelah hian mi tam tak tan beiseina kan siamsak a ni," a tih laite pawh thawnthu mai an chang ta - beiseina siamtu tan beisei a bo a, Foxes thawnthu ngaihnawm chu a zam ral ta.

Leicester City hian Pathianni zan khan an tih tur an ti ngei a, an mikhual West Ham chu 2-1 in an hneh - mahse, Foxes tan chak a tawk zo lo. Everton-in 1-0 in Bournemouth an hneh miau a, Everton an him a, Leicester an tla.

Hetihlai hian Tottenham Hotspur chuan 4-1 in Leeds United an hneh a, coach Sam Allardyce hoin Leeds an tla bawk - Leeds hian chak bakah Everton leh Foxes chetsual an chân tel a ngai a, an duh angin a thleng lo vek!

A na asin

Leicester City-in Premier League-a cham turin hnehna chan phawt a ngai tih an hria - Harvey Barnes leh Wout Faes hmanga 2-0 a hmahruaiin, Pablo Fornals-a'n Hammers tan khung ve mah se awmzia a nei phak lo.

Foxes inkhelh zawh hian Everton lamah inkhel a la tawp ve lo a, Merseyside club hian Abdoulaye Doucoure goal hmangin 1-0 in Bournemouth lakah hma an hruai mek.

Cherries hian goal khung ta se, 1-1 in inkhel a tawp ang a, Foxes leh Everton point hmuh zat a inang ang - mahse, goal difference hmangin Leicester an him ang a, Merseyside club an tla ang.

Foxes player-ten mangang takin lehlam inkhel tawp hun an nghak a, ṭhenkhat chuan defender Victor Kristiansen din hualin a phone-ah lehlam inkhel an an en. A tawpa an thu hriat erawh an tlak thu a ni.

A thlawn mai maw

Kum sarih liam ta mai khan khawvel barakhaihin Premier League-ah Foxes an champion a, a hnu season-ah Champions League quarterfinal an lut bawk.English top flight league-a team hmuhnawm pawl an ni reng a, season hmasa khan Brendan Rodgers hoin FA Cup-ah an champion.

Foxes hian beiseina sang tak nen season bul an ṭan a, mahse, Rodgers-a hoa beisei ang result an neih zui loh avangin April 2 khan ban a ni - tun season-ah league match 28 kaihruai hmanin vawi sarih chiah an chak a, vawi li draw neiin, vawi 17 an tlawm.

Leicester hian coach an zawn chhungin Mike Stowell leh Adam Sadler te chu coach lailawk atan an ruat a, league match hnih chhungin vawi hnih an tlawm a, season tawp thleng atan Dean Smith an lalut zui.

Mahse, Smith pawh hian eng thil danglam mah a thlen lo - league match riatah vawi hnih chiah a chakpui a, vawi thum draw neiin, vawi thum an tlawm. Rodgers kha ring tlang se, an him mai lo maw? tih chu zawhna awm thei tak a ni.

Leeds an thamral

Tun season-ah Leeds United an talbuai takzet - coach pali an nei hman! February khan Jesse Marsch an bân a, a hnuah Michael Skubala, Javi Gracia leh Sam Allardyce ten an enkawl a, Big Sam an lakluh hian match li an la bak.

Big Sam hian inhamtang tura point 36 an mamawh thu a sawi a, mahse, point 31 nei chungin an tla - a him chin chiaha awm Everton-in point 36 an nei thung. Big Sam hian match li aṭangin point khat chiah a hlawhchhuahpui.

Kum 2004 khan Leeds hi Championship lamah an lo tla tawh a, kum 16 hnuah top flight league an khel. Mahse, kum thum chiah an cham hman a, Premier League an mangṭha leh ta.

Spurs tan Harry Kane chuan goal hnih khungin, tun season-ah league goal 30 a khung tling a, Pedro Porro leh Lucas Moura ten goal khat ve ve an khung bawk - Leeds tana Jack Harrison-a goal khungin mualphona a khuh phâk lo.