Ligue 1 player ṭha ber Mbappe

Kylian Mbappe chu a zawna a vawi lina atan Ligue 1 player of the season atan thlan a ni. France international hian a club Paris Saint Germain chu a vawi 11 nan league champion a nihpui.

Mbappe hian tun season Ligue 1-ah goal 28 a khung a, match khelh hmabak pakhat la awm mah se goal khung hnem ber a nih ngei a rinawm - goal khung tam ber a nih chuan a vawi ngana a ni ang.

Kum 24 mi Mbappe chuan, "Engtik lai pawhin hnehna chan ka duh a, kan ram league sang bera ka hming a inziak ve ṭhin hi ka lawm. Hetiang anga a kum zawna dawn erawh ka beisei phak bak a ni," a ti.

France rama football inelna sang berah hian Zlatan Ibrahimovic chu player ṭha ber chawimawina vawi thum a lo dawng tawh a, record inṭawm an chelh lai hi Mbappe chuan a rawn khum ta chiah.

Nipui bazar hmasa khan Mbappe hian Real Madrid a zawm teuh hle, mahse Paris club tan contract a ziak thar ta zawk. Tun nipui bazar lo awm turah pawh Spanish club nen hian sawizawm a ni leh nasa tawh hle.

Mbappe chuan, "Paris Saint Germain-ah hian ka hlim a, ka club-ina hma a lakna leh a hmathlirah hian tel zel ka duh. Season tharah pawh PSG tan ka khel ang," tiin a sawi a, club thar neih mai a la tum rih lo.