Milan chhandamtu Giroud

Olivier Giroud hi chuan danglam bik riauna hi a nei leh tlat ṭhin, thawm na tak ni lo mah se mamawh huna ding chhuak ṭhin a nihna chu AC Milan tan pawh a lantir leh ta - season thara Champions League khel turin a tlinpui.

Pathianni zan Serie A inkhelah Milan hian Giroud-a goal khat hmangin Juventus chu 1-0 in an hneh a, khelh hmabak match khat la nei mah se Milan hi palina aia hniamah an tla thei tawh lo. Old Lady erawhin Europa League an la beisei thung.

Serie A champion Napoli dinhmun a chiang hma a, an hnuaia awm Lazio, Inter Milan leh AC Milan ten UCL khelhna tur ticket an nei fel tawh, match khelh hmabak pakhat an la neih avangin an awmna tur hmun tak erawh a la danglam thei dawn.

Minute 40-naah Giroud hian Davide Calabria-a cross chu goal awmchhun ni turin a tauh lut a, point 10 an paihsak Juventus tana Champions League beiseina an tihtawpsak nghal - Turin club tan chun a na khawp ang.

Tun season chhungin Rossoneri hian San Siro leh Allianz Stadium-ah Juventus hi an hneh, tun hnai kum 50 chhungin anmahni mual leh khualmualah season khat chhungin Juve hneh ve ve hi ṭum thum chiah an nei hial.

Kum 36 mi Giroud chuan, "Kan khelh ṭhat ber ṭum ni lo mah se point thum hmuh kha a tawk hle, point hmuh kha kan tana pawimawh ber chu a ni," a ti a, kumin September thlaah kum 37 tling dawn tawh mah se inkhelh nuam a la tih thu a sawi bawk.

Tun season inelna hrang hranga goal 17 khungtu Giroud chuan sawi zawmin, "Season hmasa khan Serie A lamah kan khel ṭha hle a, kan champion. Kuminah league lamah cheṭha lo mah ila UCL lamah kan thleng thui, season tharah chuan inelna lian pahnihah ṭha taka khelh kan tum ang," a ti.