Barcelona an chak; Champions League khel tur Real Sociedad

Tun season Nou Camp-a an match hnuhnung berah Barcelona chuan 3-0 in Real Mallorca an hneh a, Ansu Fati chuan goal hnih khungin Gavi chuan goal khat a thawh bawk.

Barcelona hian November 2024 hma chu Nou Camp-ah an khel leh tawh dawn lo - an khelmual hi siam ṭhat hna thawh a ni dawn a, season khat chhung chu Olympic Stadium, Montjuic-ah an khel dawn a ni.

Pathianni zan La Liga inkhel ngaihven hlawh dangah Real Sociedad chuan 2-1 in Atletico Madrid ngam lo mah se an elpui Villarreal an tlawm ve tho avangin palina an ni chiang a, season tharah Champions League an khel dawn.

La Liga aṭang hian champion Barcelona bakah Real Madrid, Atletico Madrid leh Real Sociedad ten Champions League hi an khel dawn a ni.

An chak chiang

Barcelona-in Nou Camp-ah hnehna chang turin harsatna an tawk lo - Fati chuan inkhel ṭan aṭanga minute khatna lekah goal hmahruai a khung a, minute 14-naah Mallorca winger Amath Ndiaye chu Alejandro Balde laka a chet dan hlauhawm tak avangin hnawhchhuah zui a ni.

Mallorca-in si khat an phur a, player 10-in an khel bawk - chawlhlawk pawh hman a nih hma emin chak tur a chiang tawh, tia sawi theih a ni a, minute 24-naah Fati chuan an goal hnihna a khung zui.

Lionel Messi hak ṭhin, number 10 rochuntu Fati hi hliam vanga a talbuai ngun em avangin beisei a phak lo a, chhuak tur ang hiala sawi thawm a awm hman - mahse, Nou Camp-ah a theihna a pholang a, thuneituten ngaihtuahna an seng thar ngeiin a rinawm.

Barcelona chak nemngheh nan Ousmane Dembélé siamsak chu Gavi chuan minute 70-naah a khung ve leh bawk a, hun tawp thlenga goal dang awm loin, 3-0 in Barca an chak.

Mangṭha legend

Season a zawh rualin Barca vanglaia an player pawimawh Sergio Busquets leh Jordi Alba ten Catalan club an chhuahsan dawn a, Nou Camp-a an match hnuhnung berah player pahnih hi Barca-in a thlahna hun an siamsak.

Barca-in player pahnih an thlahnaah hian Busquets leh Alba hian tun season-a nomawi an chawi pahnih Spanish Super Cup leh La Liga Liga nomawi an chawi chhuak - an pahnih hian Mallorca lakah inlan ve vein, hun tawp dawnah lakchhuah an ni. Fan-ten ding chungin an zahna an lantir a, Barca tana thawnthu ngaihnawm ziaktute chu thlahin an awm ta.

Busquets chuan, "Naupang tê ka nih aṭang tawhin he khelmuala inlan hi ka lo suangtuah tawh ṭhin. Khawvela club ṭha ber tana ka khelh theih avanga ka inchhuanna leh hlimna hi tuman min chhuhsak thei lo ang. He club member leh ṭantu ka ni a, naupang ka nih laia ka beisei ṭhin zawng zawng kha nei vek chungin he club hi ka chhuahsan dawn a ni," a ti.

Alba chuan, "Ka chunga inṭhatna zawng zawng avangin lawmthu ka sawi a, he club jersey hak phak hi inchhuanna tham a ni. Culer (Barca ṭantu) ka ni hi ka inchhuang a, midang puitu nih ka tum fo ṭhin. Professional ka nihna angin vawiin hi ka hlim ni ber a ni hial ang," a ti a, youth team-a a khelh ṭhinna Barca-a la kirtu Tito Vilanova hnenah lawmthu a sawi bawk.

Khelmual thar

Mi 90,000 chuang lenna leh khawvela stadium hmingthang ber pawl Nou Camp-ah Barca an khel tawh rih dawn lo a, season tharah Olympic Stadium chu an tan an 'in' a ni rih dawn.

Olympic Stadium hi 1992 Olympics thlenna khelmual a ni a, mi 55,926 lenna niin, Espanyol pawhin 1997-2009 inkar khan stadium atan an lo hmang tawh. Barca hian season khat bak an hmang dawn lo.

Nou Camp hi June thla aṭangin a siam ṭhat hna thawh ṭan tur a ni dawn a, 2025-26 season-ah siam zawh chauh tura beisei ni mah se season tharah Barca hian an khelmual hi an luahlum lehnghal ang - hetih hunah hian 50% chu zo hman tura beisei a ni.

Catalan club hian tun season-ah match khat khelh tur an la nei a, June 4, zan dar 12:30-ah Celta Vigo chu khualmualah an lenchilh dawn.

Top four

Real Sociedad-in Atletico Madrid ngam lo mah se an elpui Villarreal tlawm zarah top four-a an dinhmun an sawhnghet a, 2003–04 leh 2013–14 a Champions League lo khel tawh team hian an club chanchina a vawi thum nan Champions League an khel dawn.

Atletico Madrid hian minute 37-naah Antoine Griezmann hmangin goal hmahruai an khung a, minute 73-naah Nahuel Molina chuan a belhchhah leh bawk. Hun tawp nan minute hnih chiah a awm tawh tihah Alexander Sørloth chuan Sociedad tan a khung a, a team a chhanhim zo lo.

Mahse, inkhel lehlamah Villarreal an tlawm a, Sociedad an thaw huai - Villarreal hian khualmualah Rayo Vallecano an lenchilh a, an hneh ngei tura ngaih team lakah 2-1 thoin an tlawm.

First half-ah goal lut lo mah se Rayo tan Raúl de Tomás leh Isi Palazón te chuan goal an rawn khung a, Villarreal tana minute 83-naa Giovani Lo Celso goal khung chu a team ben harh nan a tlai hret tawh.