Malaysia Masters champion Prannoy

Badminton inelna Malaysia Masters 2023 neih zawh takah HS Prannoy a champion. India tlangval hian Weng Hong Yang chu 21-19, 13-21, 21-18 in a hneh a, a vawi khat nan BWF World Tour title a la.

Pathianni khan Kuala Lumpur-ah final hi khelh niin, player pahnih hi an vawi khat intawnna a ni a, inkhel pawh a hmuhnawm. Game thum an khelh hnuah erawh tournament tir lama rinkai ni phak lo Prannoy a dingchang ta zawk a ni.

Kum 30 mi Prannoy chuan, "Engtik niah emaw chuan ka tan hian hun ṭha a la inherchhuak ve ngei ang tiin ka ngaihtuah ṭhin, chu hun chu a lo thleng ta niah ka ngai. Ka tan chuan hetiang hi chu thil hlu bik a ni," tiin a sawi.

Malaysia Masters hi a pawimawh - Paris 2024 Olympics khel phak tur zawnna tournament zinga hmasa ber a ni a, infiamna khawmpui lian kalkawng a nih tel avangin Prannoy tan chuan a hlu zual hle ang.