Umphak theih loh Verstappen leh Red Bull

Formula 1 tun season zet chu Red Bull el phak an awm rih lo a, an driver ṭha Max Verstappen chu midang chunga leng a ni bawk. Pathianni zana tlan zawh tak Monaco Grand Prix-ah pawh Verstappen hian hnehna a chang.

Ruah surin intlansiak a tikhaihlak deuh a, tlankawng a huh hian chetsual a hlauhawm ṭhin. Car ke (tyre) thlan dik thiam a ngai a, kawng a ro leh hman phei chuan intlansiak boruak a danglam ṭhin hle - hetiang boruak karah hian Red Bull team chu a che fuh ber an ni.

World champion ni lai Verstappen-a'n qualifying a tlan ṭha a, a hmasa ber aṭangin a tlan ṭan. Dutch tlangval hian amah umtu Fernando Alonso lak aṭangin harsatna ṭhenkhat tawk ve mah se, buaina lian lutuk tawk loin hnehna a chang.

Tun season intlansiak vawi ruk an neih tawh chinah Verstappen hi vawi li a chak tling ta, a teammate Sergio Perez chu vawi hnih a chak thung - team dang tan hmun an la kian ve miah lo tihna a ni, duhthusama ṭhain season bul an ṭan.

Point 144 neia hmahruaitu Verstappen chuan, "Monaco nihna leh danglamna dik tak chu kan hmu leh chiang hle, kawng a nalin chetsual palh a hlauhawm thei hle. Fal taka hma ka hruai lai pawhin ka thla a muang thei chuang lo," a ti.

Red Bull driver pakhat zawk Perez erawh intlansiak ṭan aṭanga rei lo têah a car ke an thlaksak a, a fuh zui vak lo. Mexican driver hian harsatna a tawk zui zeuh zeuh a, a tawpah chuan 16-naah a thleng hram.

Perez-a'n point a hmuh loh avangin championship hmahruaitu Verstappen a kal fal theih phah. Verstappen hian amah hnaih bertu aiin point 39 zetin hma a hruai fal ta a, a zawna a vawi thum nan champion beiseina a sang zual ang.