Muchova lakah Sakkari a chak lo

Pathianni tlai aṭangin French Open 2023 khelh ṭan a ni a, hmeichhe lamah player langsar pakhat a tla nghal. Seeded pariatna Maria Sakkari chu mi hriat hlawh vak lo Karolina Muchova hneh loin a zinkawng a tawp nghal.

Roland Garros, Paris-ah Czech Republic nula Muchova hian Sakkari hi 7-6 (7-5), 7-5 in a hneh a, hnehna chang tur hian darkar hnih chuang lai hun a hmang - inkhel awlsam tak chu a ni lo.

World number 43 Muchova chuan, "Player ṭha tak nena inhmachhawn chu a hahthlak ngei mai, a bik takin tie break kan khelh lai phei kha chuan set la lotu zawkah ka ṭang dawn emawni ka ti hman," a ti.

Hmeichhe singles inkhel dangah Jessica Pegula erawh a chak. Seeded pathumna Pegula hian amah ang bawka American player Danielle Collins chu 6-4, 6-2 in a hneh. French Open-ah hian quarterfinal a la pel ngai lo a, kuminah hian hmasawn ngei a tum ang.