Kolkata khawpuiah Aizawl FC-in East Bengal an hneh

Aizawl FC-in India ram club langsar East Bengal 1-0 in an hneh a, Standly Rosario hote tan tun season-a vawi hnih an chakna chauh ni mah se Kolkata khawpuia Red and Gold an hnehna hmasa ber a ni. Mizo club hian February 11, Thawhlehni hian Manipur club Trau an mikhual ang.

I League inkhel dangah Neroca-in Trau 5-0 in an sawp a, Imphal Derby-ah hian Pritam Singh-a'n hattrick a siam bakah Imran Khan leh Philip Adjah Tettey ten goal khat ve ve an khung. Real Kashmir-in Mason Robertson-a goal hmangin Gokulam Kerala chu khualmualah 1-0 in an hneh bawk.

Standly hian Real Kashmir an hneh loh ṭuma bul ṭan lo keeper Zothanmawia, defender C. Lalrosanga, midfielder Paul Ramfangzauva leh forward Justice Morgan te bul a ṭantir a, bench-a dah zingah Mattias Veron a tel.

Aizawl FC tana bul ṭantu zingah Mizo paruk an tel a, East Bengal lamah Lalrindika Ralte leh AFC winger hlui Brandon Vanlalremdika ten bul an ṭan ve bawk. Kolkata club hian an match hnuhnung berah Indian Arrows an hneh lo a, coach Mario Rivera erawhin a player neih chu champion pui theih tur a nih thu a sawi.

East Bengal-in result ṭha neih loh vangin coach an thlak tawh a, Mizo club-in harsatna an nei chho mek bawk. Amaherawhchu, Standly hoten table-a an dinhmun dahṭhain East bengal lakah bul an ṭan ṭha zawk a, Rochharzela'n Red and Gold tlarhnung a rum ṭhaih nasa hle.

Chutihrualin East Bengal tan AFC player hlui pahnih Ansumana Kromah leh Brandon-te goal khung theihna tur an nei a, Lalrindika Ralte ball vawrh luh ṭha tak pawh keeper 

T. Mawia'n a hlauhawm tak tak hmain a chingfel hman. Standly-a'n danglamna siam turin second half-ah Veron a luhtir a, Argentine midfielder hi danglamna siamtu a ni.

Minute 77-naah Aizawl FC captain Alfred Kemah Jaryan-a'n midfield-ah ball a chhuhsak a, Mizo club hian nalh takin Alfred, William Lalnunfela leh Justice Morgan te hmangin an chhu let nghal. Real Kashmir nena khel ṭha tawk lo Veron hian Justice hnen aṭanga a ball hmuh chu vawi hnih khawihnaah box pawn aṭangin a pet a, goal kilah tak a pet lut. Argentine midfielder Veron-a'n a theihna a pholang a, Aizawl FC ṭantu 'Red Army' an phur phah sawt ang.

Aizawl FC tlarhnunga ding Juuko Richard Kassaga, Joseph Adjei, Rosanga, Lalthlahlova leh T. Mawia ten coach rinna an ti hlawhlting a, goal an chhuah lo. Mizo club-in season ṭantirha Mohun Bagan nen goal awm loa an inhnehtawk hnua an goal an chhuah lohna hmasa ber a ni a, player an kim tawh bawk avangin 'Aizawl FC tak tak' kan hmu chho dawn a tih theih.

Aizawl FC-in Real Kashmir an hneh loh zawhah Standly Rosario chuan, "Dinhmun harsa aṭanga Aizawl FC chhanchhuak turin ka ṭha tawk," a ti a, a thusawi dikna lantir turin club ṭha East Bengal mual Kalyani Municipality Stadium-ah hnehna an chang.

Mizo club hi tun season-ah vawi hnih an chak tawh a, khualmualah ve ve an chak. Tun season bika RG Stadium, Mualpuia hnehna la chang lo Aizawl FC hian February 11-ah khualmuala an hneh tawh loh Trau FC an mikhual dawn a, phuba lakna remchang a ni thei ang.