IPL 2023 lal ‘Chennai Super Kings’

Indian Premier League 2023 final boruak a sang a, ruahsur vanga inkhel lo thei dinhmuna a din hnuah khuanuin zah a ngai a, ruahsur a bang. Chennai Super Kings-in ball hnih chiah a awm tihin 10 runs la mamawh mah se Ravindra Jadeja-a'n thilmak a thlentir a, Chennai hian champion lai Gujarat Titans chu wicket ngaa hnehin a vawi nga nan IPL-ah an champion.

Kumin final hi Narendra Modi Stadium-ah khelh a ni a, Pathianni zan kha inkhelh hun atana ruahman ni mah se ruahsur vangin khelh theih a ni lo. Reserve day ni khat dah a ni a, Thawhṭanni zan hian ruahsur vang bawkin inkhel zo thei lo se, league-a pakhatna Titans chu champion tur an ni. Ruahsurin inkhel a tih khaihlak avangin Chennai dinhmun chhe hman a, a tawpah erawh Mahendra Singh Dhoni leh a hote tan malsawm ruah a ni thung.

Boruak a nung

Final khelhna hmun hi Narendra Modi Stadium, Ahmedabad a ni a, Gujarat tan 'home match' anga chhal theih ni mah se entu nuai khat chuang zingah kawr eng ha an tam zawk. MS Dhoni leh Chennai boruak a lian hle.

Ṭhumvawrah Chennai an vannei a, MS Dhoni-a'n ruah sur tur a hre lawk ta emaw tih theih turin vawm hmasak a thlang. Gujarat opener pahnih Wriddhiman Saha (54) leh Shubman Gill (39) ten bul an ṭan ṭha a, chutihrualin dinhmun ṭha zawka dahtu erawh Sai Sudharsan niin ball 47 lekah 97 runs a siam.

Captain Hardik Pandya-a'n ball 12 aṭangin 21 runs a rawn siam bawk a, over 20-ah 214/4 an tlin. Chennai bowler zingah che ṭha fal an awm lo a, Gujarat-in 214 runs an siam nachungin batting pitch a nih miau avangin an demawm hran lo.

Ruahsur leh hmuhnawm

Ruahsur vangin Chennai bat hun a thleng thei lo a, inkhel turte leh inkhel entuten ruah ban hun an nghak. A tawpah rauhsur a bang a, Duckworth-Lewis method hman a ngai. Over ngain inkhelh hun tihtawi a ni a, Chennai target chu 171 a ni.

Super Kings tan Ruturaj Gaikwad (26) leh Devon Conway (47) ten bul an ṭan ṭha a, Gujarat bowler-te an lamtir a ni ber. Opener pahnih inkawp hian over 6.2 lekah 74 runs an siam hman a, mah se Noor Ahmad-a'n over khatah an pahnih hian a vawm hlum ve ve.

Chennai dinhmun ṭha chu wicket pahnih hloh vangin derthawng leh mah se Shivam Dube (32*) leh Ajinkya Rahane (27) ten opener-te an thlawp ṭha a, Ambati Rayudu-a'n (19) a rawn thlawp ṭha bawk.

Over 12.4-naah Mohit Sharma-a'n Rayudu a vawm hlum a, captain cool Dhoni a rawn luh avangin mipui thawm a ring hle. Mahse, Dhoni hian ball khat chauh a hmachhawn a, a golden duck avangin pavillion lam a pan lehnghal.

Over hnih a la awm tihin Chennai tan 21 runs siam a la ngai a, Mohammed Shami-a'n rawn vawmin run riat chauh a pe. Over tawp berah 13 runs siam a la ngai a, Mohit Sharma-a'n a rawn vawm.

Mohit Sharma-a'n yorker leh full toss hmangin ball hmasa pali a rawn vawm a, Ravindra Jadeja leh Shivam Dube ten run thum chauh an siam. Chennai tan chak turin ball hnihah 10 runs siam a ngai a, six leh four vuak a ngai tihna a ni.

Gujarat ṭantute chak turah an inngai hman a, an thawm a rawn ring. Mahse, Jadeja-a'n a thiam thil rawn pholangin six runs a rawn vua a, ball tawp berah four runs a la ngai. Jadeja-a'n mawhphurhna hlen zuiin ball hnuhnung ber chu 'flick' keuhin four a vaw chhuak a, Chennai-in hnehna an chang.