Europa League Final Jose Mourinho-a Roma hmaah Sevilla

Zanin dar 12:30 hian Europa League final chu Pukas Arena, Budapest, Hungary-ah khelh a ni dawn. European football inelna sang pahnihna nomawi hi AS Roma leh Sevilla ten an inchuh dawn.

Europa League a nih tawh chuan Sevilla hi team lian an ni, vawi ruk champion tawh an nih avangin sulhnu an nei ṭha takzet. Roma hi Jose Mourinho enkawl an ni thung - Portuguese manager hi midangin tih theih loh tura an ngaih ti thei ṭhintu a ni ve bawk.

Pa maksak Mourinho

Mi tih theih loh a ti thei fo a, mi tih duh loh tur pawh a ti leh mai ṭhin - Europa League final an khelh tur inbuatsaihna hnuhnung berah pawh Mourinho hian a coaching staff-te chu training neihnaah luhtir a remti lo!

Roma manager hian inkhelh dan tur a ruahmanna a pui thei tur mi tlemte chauhin training hi an chhim a phal a, a ham 'strick' hle tihna a ni. Mourinho hian tun hma lam thil ni loin tun hun hi a pawimawh ber tih a sawi.

Champions League leh Europa League champion pawh ni tawh Mourinho chuan, "Tun hma lam thil chu a liam tawh, a pawimawh ber chu kan hma hun lo thleng tur hi a ni, ka tan chuan tun ṭuma final khelh tur pawh hi thil thar a ni dawn.

"Theihtawp kan chhuah dawn, ka samṭuak vangin mi ṭhenkhat chuan upa deuh tawhah min ngai a ni mai thei, a nih loh zia a taka lantir ka tum dawn. Rome khawpui hi ka ngaina a, a chhunga awm Roma club hmasawn theih na ni tin ka thawkrim," tiin a sawi.

Season hmasa khan Mourinho kaihhruaina hnuaiah Roma hian Europa Conference League nomawi an chawi. Italian club hian European football-a nomawi an chawina hmasa ber a ni - tunah Europa League nomawi chawi turin match khat chak an la hmabak.

Hlawhtling ber

Football huangah chuan a thiam ber leh ṭha ber sawi theih a ni lo, a tehtu leh thlirtu a zirin a danglam thei - nomawi chawi hnem ber erawh sawi theih a ni. Europa League-ah chuan Sevilla (6 titles) hi champion ngun ber an ni.

Tun season final lut tur hian an kalkawngah Manchester United leh Juventus te an pet chhuak. An player neih leh club ropuina aṭanga teh chuan English leh Turin club lakah Spanish hi an buk a rit lo ang, mahse Europa League a ni miau a, an te bik lo.

Sevilla coach Jose Luis Mendilibar chuan, "Kan thil tum chu a ṭha thei ang bera inelna hmawr bawk a ni. Man United leh Juve kan hneh thei a, chuvangin kan match hmasa lamah khan team ṭha hneh turin theihna kan nei tih a takin kan lantir tawh.

"Budapest-ah team thar leh hmel thar nen kan inkhel leh dawn, mite chuan Jose Mourinho naute hi chak zawk turin an ring a ni mai thei. Player ṭha leh coach ropui tak chu an ni ngei mai, mahse keini pawh hian theihna kan nei a ni tih a takin kan lantir ang," a ti.

Match an khelh tawh ṭhin dan thlir chuan Sevilla hian goal an nawr leh ngeiin a rinawm, an khingpui tur hi goal ven thiam an ni thung. Roma hian Bayer Leverkusen lakah ball chang mang lo chungin goal an veng thei a, counter attack chu an innghahna ni leh ang.

Dybala a dam

Jose Mourinho-a'n team a enkawl tawhah player hman thiam leh duh bik a nei ṭhin, tuna a club enkawl lai Roma-ah pawh forward Paulo Dybala chu a hman thiam tak a ni mek - Argentina international hi hliam vangin a chhawr tam tawk lo thung.

Dybala hian training a zawm ṭha pangngai a, zaninah bul ṭan thei tura ngaih a ni. Season khata goal tam tak khung ṭhin ni lo mah se goal pawimawh khung theitu a nih bakah an goal nawr nana thluak hmangtu a ni ṭhin - Roma tan ani inkhel thei tur hi chanchin ṭha a ni.

Sevilla lamin hrem vangin defender Marcos Acuna an chhawr thei dawn lo a, a hmunruak hnawh khat thei tur erawh an nei. Chutihrualin Argentina international hi tawnhriat nei ṭha a ni a, goal venhim bakah a nawr lam thiam tel a nih avangin a tel lo tur hi channa a tling.

Coach Mendilibar-a'n Europa League a ngaipawimawh a, hei vang hian La Liga season tawp lamah pawh a player ṭha a hahchawlhtir hmiah. Zaninah erawh a siruk lain an bei dawn - an champion theihna tur a nih chuan minute 90 chhung chu engkim tih an huam leh ang.

Inlan tura rinte:

Sevilla: Bounou; Jesus Navas, Bade, Gudelj, Alex Telles; Fernando, Rakitic; Ocampos, Oliver Torres, Bryan Gil; En-Nesyri.

AS Roma: Rui Patricio; Mancini, Smalling, Ibanez; Zeki Celik, Cristante, Matic, Spinazzola; Dybala, Pellegrini; Abraham.