Chelsea-ah Poch a chiang ta - bul ṭanna thar?

Premier League club talbuai Chelsea chuan season tawp rualin thuthar an nei nghal a, Tottenham Hotspur boss hlui Mauricio Pochettino chu an coach ni tura an lakluh thu an puang.

Paris St-Germain pawh lo enkawl tawh Poch hian July 1 aṭangin Stamford Bridge-ah a hna a ṭan dawn - kum hnih chhung atan contract a ziak a, a ṭul dan a zira kum khat dang pawhsei theih a ni ang.

Chelsea chuan, "Mauricio hi world class coach, record ropui tak nei a ni a, kan zinga a tel thei tur hi kan lawm hle a ni," tiin thuchhuah an siam a, Chelsea fans an lawm ve leh lawm ve loh erawh a hriat loh.

Poch hian Spurs a lo enkawl tawh avangin Premier League lamah a mikhual lo a, mahse, nomawi lamah a mikhual thung - Chelsea hmelma club a enkawl lai hian nomawi chawi a nei lo.

Duhthlan hmasa ber

Blues chuan Poch chu an duhthlan hmasa ber a nih thu sawiin, "Ani chauh hi inbiakna neihpui tura club-a kan sawm a ni," an ti kher a, Julian Nagelsmann-a agent Volker Struth-a'n Chelsea first choice anga Nagelsmann a lo sawi tawhna chungchang chhanletna ni nghalin a lang.

Poch hi Blues sporting director pahnih Paul Winstanley leh Lawrence Stewart te nen an thawk dawn a, Winstanley & Stewart chuan thuchhuah siamin, "Mauricio tawnhriat, thiamna, hruaitu ṭha nihna leh nihphung te hian hma lam kan panna kawngah Chelsea a puih theih kan beisei a ni," an ti.

Hetah hian fakna a tawp mai lo. Blues Sporting Director pahnih chuan, "Hnehna chang ṭhin coach, league hrang leh ṭawng hrang hrang hman a ṭulna hmuna hna lo thawk tawh a ni a, a kalphung, a game duhdan leh hmasawnna thlentir zel a tumna hian a lam min hawitir a ni," an ti.

Poch hian 2021-22 season khan Ligue 1-ah PSG chu champion nomawi a chawipui a, Coupe de France leh Trophée des Champions-ah vawi khat ve ve a champion pui bawk - Espanyol, Southampton leh Spurs lo enkawl tawh bawkin, nomawi chawi dang sawi tur a nei lo.

Chelsea thlangtu

Poch hian kum khat chhungin pound maktaduai 10 bawr vel a hlawh dawn niin khawthlang media te chuan an tarlang a, Argentine coach hi football coach hlawh hnem ber pawl a ni dawn.

July 2022-a PSG-in an ban hnu khan Poch hi club nei loin a awm reng a, mahse, duhtu a hmuh loh vang ni loin amah lamin a duhtui vang zawk a ni - khaw khat tlangval senior ang deuh a ni ber!

Kum 51 mi coach hi Benfica, Athletic Bilbao, Aston Villa, Nottingham Forest, Sevilla, Villarreal, Nice leh Leeds United ten an sawm vek a, mahse, nomawi chawi tum club zawm a duh avangin a hnar vek.

Chelsea pawh hian a hmain vawi hnih an lo ngaihven tawh a, tuna an inremnaah pawh hian an inbiakna hmasa berah chuan a lo hnar. Mahse, Blues enkawl tura zalenna zau zawk pek a nih hnuah sawmna a pawm a, London-ah bawk a awm leh dawn - club erawh a inang ta lo thung.

Sulhnu leh hmachhawp

Pochettino hi kum nga chhunga Chelsea coach nghet parukna a ni dawn - hei hian Chelsea dawhtheih lohzia a hrilhfiah a, Stamford Bridge-ah hian nuamsaa hnathawk tura lut tura a inngai a nih chuan Poch hian a ring sual ang.

Todd Boehly leh a thawhpuiten Chelsea an lei hnuah London club an talbuai zual a, American sumdawng hausa hi nikum July aṭangin Chelsea neitu ni ve chauh mah se coach pali a nei der tawh!

Chelsea an lei tirha coach Thomas Tuchel an ban a, a thlaktu Graham Potter an ban leh a, season tawp thleng atan Frank Lampard an la zui a, tunah Poch nen an inrem leh ta - kum khat pawh a liam hma emin coach pali a hrawn hman!

Blues hian season hman zawh takah ringawt khan player lei nan pound maktaduai 550 an seng a, mahse, Lampard hoa 12-na ni chungin, kum 25 chuanga season an khar hniamna ber record a ni - Poch, i tan hna a inṭan e!

Hnathawh dan

Boehly-a'n sum ren lo mah se tuna Chelsea neih sa thuam ṭhat ringawt pawh Poch tan hna tling a ni dawn a, player man to fal, World Cup nomawi chawitu Enzo Fernandez leh Ukraine winger Mykhailo Mudryk te hi an ṭhat dan a ngaihtuah chhuah a ngai.

Chelsea hian Inter Milan-ah loan-a Romelu Lukaku an chhuahtir avangin number 9 nei mumal loin season tluan an hmang a, Pierre-Emerick Aubameyang chunga rinna an nghah ngam bawk si loh avangin an talbuai hle.

Lukaku hian tun hnaiah Inter tan a khel ṭha viau a, Chelsea a kir hi a châk ang em, tih chu zawhna awm a ni. Poch hian a duh chuan Lukaku a nei thei a, Belgian striker a duh khawp loh chuan number 9 rintlak zawn chu a hna tur a ni.

Spurs boss hlui hian Harry Kane a lo enkawl tawh ṭhin a, tun season Premier League-a goal 30 khung thei hi lalut ta ngat se Chelsea tan Poch ber kher an lo ruat hi, tifuh intih ngawih ngawihna tham a ni nghal ang.