Kan lo kir leh ang - Leicester Chairman

Premier League aṭanga tla Leicester City chairman Aiyawatt Srivaddhanaprabha chuan English top flight league-ah an lo kir leh vat tur thu a sawi a, hetihrual hian hriat hrehawm tak tak message a dawn nual thu a sawi bawk.

Aiyawatt Srivaddhana-prabha-a te chhungkua hian kum 2010 aṭang khan Leicester hi an enkawl ṭan a, a pa Vichai a thih avangin kum 2018 aṭang khan Aiyawatt hian Foxes hotu lu ber dinhmun hi a chelh ṭan.

Leicester chairman Aiyawatt chuan, "Division hniam lama tlak thlak hi tlakhniamna chu a ni ngei a, mahse, hei hian min tihnual dawn lo. Kan relegate avangin kan tuar tlang a, mahse, kan lo kir leh ang," a ti.

Aiyawatt-a te chhungkuain Foxes an lei hnuah hian Premier League kaisanpuiin, football khawvela thawnthu ngaihnawm ber hial ziakin an champion a, FA Cup-ah an champion bawk.

Mahse, season hmasa lawka FA Cup champion a, Champions League khelh phak tuma beitu club hi tunah chuan an relegate a, season tharah Championship an khel dawn.

Srivaddhanaprabha chuan, "Theihnghilh tawh loh tur thawnthu ropui tak tak ziak hoin, mi tam takin thil theiha an ngaih loh chu kan ti ho - Premier League aṭanga relegate tura rin kai aṭangin champion team kan ni thei a, infiamna khawvela thawnthu ngaihnawm ber zinga mi chu kan ziak a ni," a ti.

Leicester player langsar zingah nipui ruala contract hmang zo tur an awm nual a, an zingah hian Youri Tielemans, Jonny Evans leh Caglar Soyuncu te an tel. Coach Dean Smith pawh tun season tawp thleng atan chauh lakluh a ni a, a contract a zo dawn.

Foxes hian nipuiah inthuam ṭhat an tum dawn tih a chiang a, mahse, Championship-ah an awm tawh miau avangin a awlsam lo ang. Aiyawatt chuan, "Game 38 hmangin kan nihna pholan a ni a, kan ṭha tawk lo a ni," a ti a, an tawnhriat aṭanga inzir a ṭul thu sawiin, theihtawp a chhuah chhunzawm tur thu a sawi bawk.

Leicester Chairman chuan sawi zawmin, "Fans tam tak aṭangin a ṭha leh ṭha lo lam message ka dawng hnem hle. A ṭhen chuan club hralh turin min duh a, a ṭhen chu ṭawngkam mawi lo tak tak a ni hlawm. Mahse, hetih rual hian min thlawpna message tam tak ka dawng tel tho," a ti a, anmahni thlawptute thu leh hla chu an tan a hlut takzet thu a sawi.