Hnehna nena bulṭan Alcaraz leh Djokovic
French Open khelh laiah champion tura rinkai Carlos Alcaraz leh Novak Djokovic te chuan an match hmasa berah hnehna an chang, player pahnih hi an chak tluang chho zel a nih chuan semifinal-ah an inhmachhawn thei dawn.
Thawhṭanni zan inkhelah Alcaraz hian Flavio Cobolli chu 6-0, 6-2, 7-5 in a hneh a, Grand Slam inelna bikah chuan vawi kua a inlan tawhah a match hmasa berah a la chak fai vek - hneh nei loa tlak nghal ang kha a la nei lo tihna a ni.
Seeded pakhatna Alcaraz chuan, "Suzanne-Lenglen Court-ah hian ka inkhelh vawi khatna a ni a, a nuam ka tiin min ṭantu an tam avangin a nuam zual hle. Inkhelh hmain Stefanos Tsitsipas nen kan titi a, amah ang bawkin nuam ti taka inkhelh tawp mai kha ka tan a ṭha," a ti.
Kum 20 Alcaraz hian a match lehpekah chuan Japan tlangval Taro Daniel a tum dawn. US Open champion a nih hnuah tun ṭum hi Grand Slam a khelh lehna hmasa ber a ni dawn a, a tan fiahna lian a ni dawn.
Inkhel dangah Djokovic chuan Aleksandar Kovacevic chu 6-3, 6-2, 7-6 (7-1) in a hneh. Kovacevic a hneh hnuah Djokovic chuan Camera Lens-ah 'Kosovo hi Serbia duhlai a ni a, tharum thawhna ti tawp rawh u,' tih a ziak.
Kosovo hian 2008 khan Serbia aṭanga an indan thu an puang a, mahse Serbia chuan a ram hi a satthla ṭhen duh lo. Tun hnaiah indan duh mi ṭhenkhat chuan tharum thawhin buaina an siam, hei hi Djokovic chuan titawp turin a ngen a ni.
Djokovic chuan, "Politician ka ni lo a, inhnialna chawh chhuah tum pawh ka ni lo. Mahse, mite hriat hlawh ka nihna avangin buaina hi tawp turin ka ngen ve a ni, kan mi leh sa ten harsatna an tawk a nih chuan kan ngawi reng bik tur a ni lo.
"Social media lamah sawiselna nasa tak ka tawn phah ngei ang tih pawh ka hria, mahse kan hmun pawimawh leh thil hrang hrang kan tihna hmun Kosovo bera buaina a awm hi a pawi a ni," a ti.
French Tennis Federation lam chuan Djokovic-a thusawi leh thil tih hi an sawisel hran lo, inelna buatsaih tute hian Grand Slam huangah player-in a sawi tur leh sawi loh tur chin bithlaihna dan a awm hran lo niin an sawi.