NBA Finals khel tur Miami Heat

Rinkai lo ni chungin Miami Heat chuan NBA Finals an lut ta. Seeded hniam ber ni chungin playoff an khel a, champion tura rinkai zinga mi Boston Celtics chu 103-84 a hnehin best of seven series chu 4-3 in an la.

Seeded pariatna Heat hi New York Knicks (1999) hnua playoff khel china a hniam ber ni chunga final lut thei leh hmasa an ni. Basketball inelna ngaihhlut berah hian Denver Nuggets nen nomawi an inchuh zui leh dawn a ni.

NBA Eastern Confe-rence Finals-ah Heat hian game hmasa pathum an la a, mahse beidawng loin Boston Celtics lamin an bei let, a zawna vawi thum chak vein 3-3 in an innihrual hman hial.

Nimin zing khan a tlang tur zawk leh conference champion tih fel a ni. TD Garden-ah an inkhel a, mualneitu Celtics lam an phurin an boruak ṭhat vanglai an tawng leh tawh, mahse quarter hmasa pahnihah an hniam zawk nghal a, an lehthal tawh lo.

Heat coach Erik Spoelstra chuan, "A chang chuan kan thil duh tak nei tur chuan harsatna kan tawh a ngaih chang hi a awm. Hetiang hunah tak hian ṭanrual a ngai lehzual ṭhin, ka naute hian chak loh leh tlawm hlau loin an khel a, chu chuan rah ṭha a chhuah," a ti.

Hnehna an chan theih nan hian Jimmy Butler chuan point 28 a neih bakah rebound vawi sarih lain assist vawi ruk a nei bawk. Tun series bikah hian chawhrualin 24.7 points, 7.6 rebounds leh 6.1 assists a nei a, team tan tha a thawhhlawk hle.