Champion ngun ber Armed Veng leh champion lai Chanmari an tla
Central YMA Football-a record nei ṭha ber Armed Veng chuan an mualah Tlangnuam an ngam lo. Champion lai Chanmari pawhin ITI Veng hneh loin inelna an mangṭha.
LBS Suzuki 21st Inter Branch YMA Football Tournament-ah team 145 an tel a, ISL leh I League-a khel player-te veng leh khaw hrang hrangah an kat nuk. Hei vang hian record nei ṭha Armed Veng leh Chanmari chak lo pawh hi 'upset' a ni lo.
Armed Veng ngamtu Tlangnuam
Nimin chhun round of 32 inkhelah Armed Veng hian Tlangnuam 3-2 in an hneh lo. Vawi nga champion tawh leh nomawi chawi hnem ber ni bawk hi anmahni vengah ngei an chak loh avangin an chak loh hi a na zual.
All Mizoram Inter Village Football 2023-ah Bungkawn hneh loin last 32-ah Armed Veng hi an tla tawh bawk a, football thiam veng Armed Vengin kum zawnin beisei an pha lo.
1st MAP Ground, Armed Vengah inkhel entu kawr eng ha an tam a, Armed Veng ṭantute an ni. Amaherawhchu Tlangmuam zawk an che ṭha a, minute rukna lekah Vincent Lalduhawma hmangin goal an khung hmasa. Chawlhlawk hma hretin CVL Remtluanga'n a khung leh bawk - Armed Veng an hawihai.
Second half tir lamah Armed Veng hian penalty an hlawh chhuak, a pet turin Lalbiakthanga (BT-a) a rawn ding chhuak - pet ṭha pangngai viau mah se Tlangnuam goalkeeper Lalbiakkima'n (BK-a) a dansak.
Minute 58-naah Armed Veng bawkin penalty an hmu leh a, keeper BK-a'n Lalbiakhlua (Hlutea) pet a dansak leh. Mahse, penalty chhuih a nih hmain keeper BK-a a lo tawlh chhuak hma hret a, pet nawn niin Hlutea'n a pet goal.
Mizoram Police coach Lalbiaksanga Colney enkawl Armed Veng lamin thawhchhuah tum viau mah se an thei tlat lo. Tlangnuam forward tlan chak CVL Remtluanga an chelh lo a, Lallianzuala Chhangte nau Odisha FC forward Remtluanga hmangin goal thumna an khung. Hun tawp dawn hnaihah Armed Vengin Lalfakzuala hmangin khung leh mah se result a tidanglam tawh lo a, chak phu zawk Tlangnuamin hnehna an chang.
ITI Veng an ṭha
RG Stadiuma-ah ITI Veng leh Chanmari an inhmachhawn a, inkhelh hma aṭanga en châkawm zinga mi an ni hrim hrim. Champion lai Chanmari tan Jerry Mawihmingthanga'n ITI Veng offside trap bumin minute 10-na lekah goal hmahruai a khung.
First half-ah goal dang a luh belh lo a, second half-ah ITI Veng ṭha zawk an rawn inlan. Vei lam aṭanga Joseph Lalvenhima cross luh chu Chanmari defender Reuben Vanlalhriatzuala'n minute 51-naah an lamah a tilut.
Chanmari tlarhnung a pawp zui a, Edmund Lalrindika-a'n a class pholangin chiang zetin minute 62-naah a pet goal. Minute thum hnuah Joseph-a ball ṭha chu Edmund-a'n a ti goal a, 3-1 a ni ta daih.
ITI Veng tlarhnung an inthlahdah a, offside trap siam si loin box chhungah player an veng uluk lo. Chanmari captain Michael Lalhruaitluanga'n minute 68-naah a khung a, inkhel a nun phah hle. Mahse, champion lai Chanmari lamin goal an khung thei tawh lo a, ITI Veng lakah 3-2 in an chak lo.
Fak phu Lungdai leh Keifang Venglai
CYMA Football last 32-ah Lungdai leh Keifang Venglai ten team ṭha zinga mi Salem Veng leh Hualngohmun an hmachhawn chungin penalty shootout an thlenpui thei a, a tawpah erawh a buk rit zawk Salem Veng leh Hualngohmmun te penalty shootout hmangin an vannei.
Salem Veng hian thawm lian tak an nei a, coach Lalrindika Hmar enkawl an nih avangin thawm pawh an nei lian. Mahse, Lungdai erawhin minute 90 chhungin Salem Veng hi an chelh. Penalty Shootout-ah Salem Veng 3-1 in an vannei.
Hualngohmun leh Keifang Venglai inkhelah goal riat ngawt a lut a, a khat mawi tawkin goal a lut. Keifang Venglai zawkin goal an khung hmasa a, a tawp lamah erawh team ṭha zawk Hualngohmunin 4-2 in hma an hruai. Keifang Venglai an tlawm duh lo a, Lalbiakhlua (Biatea) hmanga siphurh an sut ṭhen hnuah injury time-ah Lalchhanchhuaha hmangin siphurt an sut zo. Penalty shootout-ah pawh sudden death an thleng chho a, Hualngohmun 7-6 in an vannei a ni.
