Team ṭha Bawngkawn, BVT, Durtlang, Lengpui leh Republic Veng an chak

LBS Suzuki 21st Inter Branch YMA Football Tournament-ah inelna ṭan hma aṭanga team ṭha zinga mi Bawngkawn, Bethlehem Vengthlang, Lengpui leh Republic Veng ten last 32-ah harsatna an tawk lo. Durtlang pawhin record nei ṭha Electric Veng 2-1 in an hneh bawk.

Bawngkawnin RG Stadium-ah team ṭha Bairabi Jt an hmachhawn a, Lalramdinthara hmanga minute 10-na leka hma an hruai hnuah Vanlalremruata hmangin first half-ah vek an khung belh. Minute 82-naah Lalrochaliana hmangin goal thumna an khung a, K. Malsawmkima enkawl team-in 3-0 in hnehna an chang.

Bethlehem Vengthlangin Marpara lakah zahngaihna an lantir lo a, 7-0 in an sawp. Suanngaihmuana'n hattrick a siam bakah Lalmuankima'n goal hnih a khung a, Lallawmzuala'n goal khat a khung ve bakah Marpara player Saidingliana'n a lamah a tilut bawk. BVT hi coach ṭha Lalsangzuala Hmar enkawl a ni.

Republic Vengin Chalrang lakah goal an khung hma a, Lalchhawnkima'n a piancham lawm nan minute ngana lekah a tauh lut. Lalrinzuala'n hattrick a siam a, Laltluangliana leh Lalruatfela ten goal khat ve ve an khung bawk.

Lengpuiin Seling 3-1 in an hneh a, an chak dan erawh a awlsam lo, minute 84-naah 1-1 a ni. Mahse, team ṭha Lengpuiin minute ruk chhungin goal hnih an khung belh a, hnehna an chang.

Player nei ṭha Durtlangin an ṭhatzia an pholang zel a, Electric Veng lakah Lalthlamuana leh Matthew Lalhmangaihzuala te hmangin an khung hmasa. Electric Veng lamin Samuel Lawmsiamkima hmanga an sut ṭhen avangin hun tawp thlengin inkhel boruak a ṭang.

Inkhel dangah Thingsulthliah Jt-in Ramhlun Venglai lakah 2-0 in hma hruai vat mah se minute 90 a zawh chuan 2-2 a ni. Penalty shootout-ah Thingsulthliah an vannei leh ta tho.

Khawzawl Vengtharin South Sabual 3-0 in an hneh a, team ṭha an nihzia an pholang. Chutihrualin South Sabual hi an ṭang thei a, an chance neih hmang ṭangkai se chuan result a danglam thei hial ang.

YMA Mission Vengin College Veng 2-1 in an hneh a, dead ball specialist Ramfangzauva'n penalty aṭangin an khung. College Vengin siphurh sutah an inngai a, offside vangin pawmsak an ni lo - an vanduai hle. Darlungin Sihphir penalty shootout hmangin an hneh - Darlungin playrer ṭha an kawl.

MPL club nei Venghnuaiin Lengpui Model 5-0 in an sawp a, an ṭha tih a chiang. Thenzawl Jt-in Mualpui 5-1 in an sawp a, inkhelh zawh hmain buaina a chhuak. Mualpui tan chak ngaihna a awm tawh loh avangin inkhelh hmabak erawh khelh chhunzawm a ni tawh lo ang.