Sialhawkin Ramhlun North an hneh nawn

CYMA Football Last 32 inkhela ngaihven hlawh ber zinga mi Sialhawk leh Ramhlun North inkhel chu beisei ang ngeiin a hmuhnawm a, a tawpah Sialhawk 3-2 in an vannei ta zawk.

All Mizoram Inter Village Football 2022 semifinal-ah Sialhawk hian Ramhlun North hi penalty shootout hmangin an hneh tawh a, tun ṭuma last 32 draw an neih khan Sialhawkin Ramhlun North an hmachhawn dawn avangin an lawm.

MSSC Ground, Muallungthua inkhel ni mah se entu an ṭhahnem - thilmak erawh a ni hran lo. Ramhlun North hian player leh mipui kal nan bus pathum an ruahman a, mimal lirtheia kalte nen chuan an tlem thei lo.

Ramhlun North-in phuba lak tum mah se Sialhawk zelin goal an khung hmasa a, captain chhuanvawr R. Laldanmawia hmanga hma an hruai hnuah AIFF Elite Academy aṭanga inzir chhuak B. Rohmingthanga hmangin Ramhlun North-in minute 58-naah an sut.

Sialhawkin Vanlalduata hmangin minute 72-naah hma an hruai nawn a, Ramhlun North-in minute riat hnuah Lalhruaisanga hmangin an sut. Penalty shootout hmangin chak zawk an zawng leh turah a ngaih theih a, mahse injury time-ah Sialhawk tan Lalfamkima'n chakna goal a khung.

Lammualah Sialhawkin Ramhlun North lakah hnehna hlado an chham tawh a, Muallungthu lamah pawh thawnthu ngai bawk a thleng. Sialhawkin Ramhlun North hliamah chi an phul belh a, CYMA Football-ah Unzi Lasi an la tizel e.